Hurmatli festival ishtirokchilari!
Qadrli do`stlar!
Xonimlar va janoblar!
Siz, azizlarni Xalqaro hunarmandchilik festivalining tantanali ochilishi bilan chin qalbimdan samimiy muborakbod etib, barchangizga o`zimning chuqur hurmatim va ezgu tilaklarimni izhor etishdan g`oyat mamnunman.
Ushbu anjumanda jahonning 70 ta davlatidan 260 nafardan ziyod mohir hunarmand va ustalar, taniqli ilm, madaniyat va san`at namoyandalari, ommaviy axborot vositalari xodimlari hamda nufuzli xalqaro tashkilotlar vakillari ishtirok etayotgani unga dunyo miqyosida qiziqish va e`tibor katta ekanidan dalolat beradi.
Ma`lumki, har qaysi xalqning amaliy san`ati uning boy o`tmishi va madaniyati, azaliy qadriyatlari, orzu-intilishlarini o`zida yaqqol aks ettiradi.
Qariyb uch ming yillik tarixga ega bo`lgan bizning jonajon Vatanimiz ham hunarmandchilik sohasidagi o`lmas an`analari, mohir usta va hunarmandlari bilan shuhrat qozonib keladi.
Ayniqsa, mana shu anjumanga mezbonlik qilayotgan go`zal Farg`ona viloyati, yurtimizning qadimiy shaharlaridan biri bo`lmish Ho`qandi latif o`zining bu boradagi betakror merosi, tarixiy maktablari bilan alohida ajralib turadi.
Biz bu o`lkada kulolchilik, ipak va abrli matolar ishlab chiqarish, yog`och o`ymakorligi, ganchkorlik va naqqoshlik san`ati, pichoqchilik, do`ppido`zlik kabi hunar turlari keng rivojlanib, milliy brend darajasiga ko`tarilgani bilan faxrlanamiz.
Jahon hunarmandchilik kengashi qaroriga ko`ra, Qo`qon, Buxoro va Marg`ilon kabi ko`hna shaharlarimizga Hunarmandchilik shahri maqomi berilganini biz asrlar mobaynida avloddan-avlodga bezavol o`tib kelayotgan boqiy an`ana va qadriyatlarimizning yuksak e`tirofi sifatida qabul qilamiz.
Aziz do`stlar!
Keyingi yillarda yurtimizda xalq badiiy va amaliy san`atini yanada rivojlantirish, bu borada tarixiy an`analarni izchil davom ettirayotgan mohir ustalarning mashaqqatli mehnatini munosib qadrlash va qo`llab-quvvatlashga alohida e`tibor berilmoqda.
Bu haqda gapirganda, qisqa muddatda bir qator farmon va qarorlar qabul qilinib, ushbu soha vakillariga zarur imkoniyat va imtiyozlar yaratib berilganini ta`kidlash lozim. Ana shunday sa`y-harakatlarimiz tufayli milliy hunarmandchilik san`ati jadal rivojlanmoqda. Buning tasdig`ini so`nggi etti yilda “Hunarmand” uyushmasi a`zolari 7 barobardan ziyod ko`payib, 10 ming nafardan salkam 80 ming nafarga etgani, sohada band bo`lganlar esa 280 ming nafarni tashkil etayotgani yaqqol ko`rsatib turibdi.
Soha rivojiga munosib hissa qo`shib kelayotgan, iqtidorli shogirdlar tarbiyalab, o`z ijodiy maktablarini yaratgan qo`li gul ustalarimizning sharafli mehnati davlatimiz va jamiyatimiz tomonidan munosib e`tirof etilmoqda. Yuzlab usta va hunarmandlarimiz Vatanimizning yuksak mukofotlari – faxriy unvonlar, orden va medallar bilan taqdirlanmoqda.
Hunarmandchilik xalqimiz kundalik hayotidan tobora mustahkam o`rin egallamoqda. Mamlakatimizda shu yo`nalishda yuzdan ziyod festival va yarmarkalar, savdo ko`rgazmalari va boshqa tadbirlar muntazam o`tkazib kelinmoqda.
Yurtimizda ikkinchi bor o`tkazilayotgan Xalqaro hunarmandchilik festivaliga uyg`un holda Rishton tumanida Xalqaro kulolchilik forumi bo`lib o`tayotgani ham bejiz emas. Nega deganda, Rishton nafaqat mamlakatimiz, balki butun Markaziy Osiyoda kulolchilik markazi sifatida ma`lumu mashhurdir.
Albatta, mana shunday anjumanlar xalq amaliy san`atiga daxldor qadimiy merosimizni asrab-avaylash, uni dunyo miqyosida keng targ`ib etish, yoshlarimizni nodir kasb-hunarlarga hurmat va mehr ruhida tarbiyalashda beqiyos ahamiyatga egadir.
Shu ma`noda, bugun ochilayotgan ushbu festival san`at va do`stlik, iste`dod va mahorat bayrami sifatida barcha ishtirokchilar va xalqimiz qalbida yorqin iz qoldiradi, deb ishonaman.
Siz, hurmatli festival qatnashchilariga sihat-salomatlik, olijanob faoliyatingizda yutuq va omadlar, anjuman doirasidagi ilmiy-amaliy konferensiya ishiga esa muvaffaqiyatlar tilayman.
Xush kelibsiz, qadimiy va betakror O`zbekistonga, xush kelibsiz, go`zal Qo`qon shahriga!
Shavkat Mirziyoev,
O`zbekiston Respublikasi Prezidenti
