Qashqadaryo viloyati Qarshi tumanida o`quvchilar paxta terimiga jalb qilingani haqida xabarlar tarqaldi. Bu holatga Kambag`allikni qisqartirish va bandlik vazirligi mazkur xabarlarga aniqlik kiritdi.
Xabar yuzasidan Qashqadaryo viloyati Kambag`allikni qisqartirish va bandlik bosh boshqarmasi Davlat mehnat nazorati inspeksiyasi 7, 38, 48 va 54-maktablarda monitoring tarzida tekshirish o`tkazdi. Natijada fotosuratlarda ko`rsatilgan maktab Qarshi tuman Maktabgacha va maktab ta`limi bo`limiga qarashli emasligi, bunday ko`rinishdagi maktab tumanda mavjud emasligi, suratlarda aks ettirilgan voyaga etmagan maktab o`quvchisi yuqorida keltirilgan ta`lim maskanlarida o`qimasligi aniqlandi.
Shu boisdan ushbu postdagi keltirilgan holatlar o`z tasdig`ini topmagan. Tumandagi maktab mas`ullariga paxta mavsumi davomida majburiy tarzda xodimlarni va maktab o`quvchilarini paxta terimiga jalb qilmaslik va o`quvchilarning ota-onalari bilan bu borada tushuntirish ishlari olib borish yuzasidan ko`rsatmalar berildi.
