Mutaxassislar SOVID-19ning yangi shtammi qanday belgilarda namoyon bo`lishini aytishdi

Kuz mavsumi boshlanishi bilan dunyoning ba`zi mintaqalarida koronavirus mavzusi yana kun tartibiga chiqdi. Epidemiologik hisobotlarda ayrim davlatlarda kasallanishlar soni o`sishi qayd etilmoqda.

Mutaxassislar buni COVID-19 ning yangi — BA.2.86 shtammi tarqalayotgani bilan izohlayapti. “Pirola” deb nomlangan mazkur mutasiya ilk bor shu yil avgust oyida Fransiyada aniqlangandi. 

Ko`p o`tmay u Isroil, Kanada, Daniya, Buyuk Britaniya, Janubiy Afrika, Shvesiya, Norvegiya, Shveysariya, Tailand va AQSh kabi mamlakatlarida ham ro`yxatga olindi. 

Jahon sog`liqni saqlash tashkiloti yangi shtammni kuzatuv ostiga olgach, chuqur laborator tekshiruvlar natijasida uning tarkibida “Spike” genining 30 dan ziyod mutasiyasi mavjudligini aniqladi. Bu “Pirola”ning yuqumlilik ko`rsatkichi yuqoriligini tasdiqlaydi.

Dastlabki o`rganishlarga ko`ra, BA.2.86 alomatlari so`nggi uch yil ichida tarqalgan boshqa koronavirus shtammlari singari o`tkir respirator virusli infeksiyalar simptomlariga o`xshash. 

Bemorlarda isitma, uzoq muddatli yo`tal, bosh og`rig`i, holsizlik, hid va ta`m bilish qobiliyati yo`qolishi kabi qator belgilar kuzatilmoqda. Kasallik ba`zilarda nisbatan engil o`tayotgan bo`lsa, boshqalarda xastalikning chekinishi uchun bir haftadan ko`proq vaqt zarur bo`lyapti.

So`nggi ma`lumotlarga ko`ra, hozirgacha, BA.2.86 bilan bog`liq o`lim holatlari kuzatilgani yo`q.

Eslatib o`tamiz, Respublika Sanitariya-epidemiologik osoyishtalik va jamoat salomatligi qo`mitasining ma`lum qilishicha, shu kungacha mamlakatimizda va qo`shni davlatlarda koronavirusning ushbu shtammi bilan kasallanganlar qayd etilmagan. Yurtimizda epidemik vaziyat barqarorligicha saqlanmoqda.