Joriy yilning 7 iyun kuni taxminan soat 17.00 larda Mirzo Ulug`bek tumani Mirzo Ulug`bek ko`chasidagi ko`p qavatli uylardan birining yo`lagida erkak kishi voyaga etmagan 7 yoshli qizga nisbatan uyatsiz-buzuq harakatlar sodir etgani haqida xabar bergan edik.
Toshkent shahar IIBBning ma`lum qilishicha, holat joriy yilning 7 iyun kuni taxminan soat 17.00 larda Mirzo Ulug`bek tumani Mirzo Ulug`bek ko`chasidagi ko`p qavatli uylardan birining yo`lagida sodir etilgan. “Nemolchi.uz” loyihasining ma`lum qilishicha, u 18 yilga ozodlikdan mahrum qilindi.
20 sentyabr kuni Jinoyat ishlari bo`yicha Mirzo Ulug`bek tuman sudi 1968 yilda tug`ilgan ushbu erkak — X.A.ni Jinoyat kodeksi 119-modda (jinsiy ehtiyojni zo`rlik ishlatib g`ayritabiiy usulda qondirish) 4-qismida nazarda tutilgan jinoyatni sodir etganlikda aybdor deb topib, 18 yilga ozodlikdan mahrum qildi.
“Nemolchi” loyihasining yozishicha, sud majlisida ayblanuvchi ishini oxiriga etkazmaganini vaj qilgan.
Eslatib o`tamiz, Oliy sud plenumining nomusga tegishga doir ishlar bo`yicha sud amaliyoti to`g`risidagi qarori 8-bandiga ko`ra, nomusga tegish yoki jinsiy ehtiyojni g`ayritabiiy usulda qondirish jinoyati tegishli jinoyat tarkibining ob`ektiv tomoni sifatida nazarda tutilgan jinsiy aloqa yoki jinsiy ehtiyojni g`ayritabiiy usulda qondirishga qaratilgan harakatlar boshlangan paytdan, ular tugatilganligidan va kelib chiqqan oqibatlardan qat`i nazar, tamom bo`lgan hisoblanadi.
