Shavkat Mirziyoev 20 sentyabr kuni Nyu-York shahriga tashrifi doirasida AQShning eng yirik “Citigroup” moliyaviy korporasiyasi raisi Jon Duganni qabul qildi.
Davlatimiz rahbari O`zbekiston banklari va davlat korxonalari obligasiyalarining xalqaro fond bozorlarida muvaffaqiyatli joylashtirilishiga ko`maklashgan korporasiya bilan samarali hamkorlik yo`lga qo`yilganini mamnuniyat bilan qayd etdi.
O`zbekiston etakchisi “Citigroup”ning mamlakatimizda “Citibank” sho``ba banki ofisini ochish bo`yicha rejalarini qo`llab-quvvatladi.
Uchrashuvda bank-moliya sohasini rivojlantirish, fond bozoridagi qimmatli qog`ozlar jozibadorligi va likvidligini oshirish uchun samarali vositalarni joriy etish, mamlakatimiz kapital bozoriga xorijiy investisiyalarni jalb qilish borasida o`zaro manfaatli hamkorlik masalalari muhokama qilindi.
AQSh korporasiyasi bilan hamkorlikni kengaytirish bo`yicha ta`sirchan mexanizmlar va aniq ijro muddatlarini ko`rsatgan holda “yo`l xaritasi”ni qabul qilishga kelishib olindi.
