Sirdaryoning Oqoltin tumanidagi ko`prikdan og`ir yuk mashinalari harakatlanishi natijasida yoriqlar paydo bo`lgani haqida xabar bergan edik.
Ma`lum qilinishicha, mazkur Toshkent—Termiz yo`nalishi vaqtincha yopildi. Bu haqda viloyat hokimligi matbuot xizmati xabar berdi.
Qayd etilishicha, 16 sentyabr kuni A-373 xalqaro avtomobil yo`lining 10 kilometridagi 1990 yilda qurilgan, 2020 yilda qisman rekonstruksiya qilingan zovur ustidan o`tgan ko`prikning Toshkent—Jizzax yo`nalishidagi qismida 5 ta oraliq qurilma balkalarida yoriq vujudga kelgan va bir qismi cho`kkan.
Harakat xavfsizligini ta`minlash maqsadida ko`prikning yarimida transport vositalarining harakati cheklanib, avtotransport vositalari harakati xalqaro ahamiyatdagi M-34 Toshkent—Dushanbe avtomobil yo`lining 104-152 kilometrlari hamda A-376 Qo`qon—Jizzax avtomobil yo`lining 219-242 kilometrlari orqali tashkil qilinmoqda.
Yo`l harakati xavfsizligi xizmati haydovchilar uchun tashkil etilgan aylanma yo`ldan harakatlanish bo`yicha batafsil tushuncha berdi.
Hozirda ko`prikni tiklash bo`yicha qurilish-montaj ishlari boshlab yuborilgan.
Shuningdek, avtotransport vositalarining mazkur yo`nalishda harakatini qayta yo`lga qo`yish uchun qo`shimcha ravishda zovur ustidan vaqtinchalik o`tish yo`li qurishga qaror qilingan. Buning uchun 50 ga yaqin kuch va vositalar jalb qilinib, 3 smenada ish tashkil qilinmoqda.
