Bugun bo`lib o`tayotgan Oliy Majlis Qonunchilik palatasining navbatdagi majlisida "Tashqi mehnat migrasiyasi to`g`risida"gi qonun loyihasi deputatlar tomonidan birinchi o`qishda qabul qilindi.
Qonun loyihasining maqsadi quyidagilardan iborat:
- tashqi mehnat migrasiyasi sohasidagi munosabatlarni qonun darajasida mustahkamlash;
- xalqaro hujjatlardagi qoidalarning xususan, majburiy mehnatga, migrantlarning sog`lig`iga ziyon etkazuvchi sharoitlarda ishlash uchun jalb etishga yo`l qo`ymaslik kabi qoidalarni milliy qonunga implementasiya qilish;
- tashqi mehnat migrasiyasi sohasidagi davlat organlari va nodavlat notijorat tashkilotlarining vakolatlarini belgilash;
- fuqarolarning mamlakat tashqarisidagi faoliyatini tashkil etish, ularni uyushgan holda ishga joylashtirish hamda chet ellik fuqarolarni O`zbekistonda mehnat qilish uchun jalb etishning huquqiy mexanizmlarini belgilash.
Qonun loyihasida mehnat migrantlarining daromadlari ikki tomonlama soliqqa tortilmasligi belgilanmoqda.
Mazkur mazmundagi qonunni qabul qilish bir qator siyosiy partiyalar, shu jumladan O`zLiDePning saylovoldi platformasida ham belgilangan edi.
E`tiborli jihati shundaki, qonun loyihasida hukumat va vakolatli davlat organlariga mehnat migrantlari va ularning oila a`zolarini ijtimoiy qo`llab-quvvatlash, sharoitlarini yaxshilash borasida choralar ko`rish vazifasi yuklatilmoqda.
