Karerasini model sifatida boshlagan bugungi qahramonimiz aktyor sifatida 1991 yilda “Va`da” filmi orqali kinoga kirib kelgan. Ayni paytda Akshay KUMAR ijod bilan qatorda prodyusserlik markaziga ham egalik qilmoqda...
— Otangizning qaysi “oltin qoidasi” esdalik bo`lib qolgan?
— Otam harbiy edi. Shu sabablimi oilamizda vaqtga nisbatan qat`iy munosabat shakllangan. Bolaligimda soat tonggi 5 da uyg`onardim. Hamon erta uxlab vaqtida uyg`onishga harakat qilaman.
— Qaynotangiz Rajesh Kxanna bilan munosabatlaringiz haqida sira gapirmagansiz?
— Balki ko`p so`rashmagani uchundir. U kishini Tvinkldan avval taniganman. Rajesh sohib mening filmimga prodyusserlik qilgan. Bag`rikeng odam edi, hech qachon ko`pchilik orasida oilaviy munosabatlarni muhokama qilmasdi. Biz hamisha o`zaro do`stligimizni qadrlaganmiz.
— Odatda qizlar turmush o`rtog`ida otasining qaysidir fazilatlarini izlaydi. Tvinkl ham shundaymi?
— Tina uchun ota-onasi hamisha birinchi o`rinda turgan. Bundan hech qachon xafa bo`lmaganman. Yana rafiqam hamisha “Mening ota-onam “Milliy mukofot” olishgan. Senga qachon berishadi?” deyishni kanda qilmaydi.
— Rafiqangiz bilan kelishmoqchiliklar haqida ko`p yozishgan. Bunday reklamaga muhtoj bo`lmasangiz kerak?
— Qachonlardir har bir qadamim haqida yozishlarini istaganman. Buni hech qachon inkor etmayman. Lekin bora-bora “qaniydi meni tinch qo`yishsa”, deb o`ylashni boshlaysiz. Hozir shaxsiy hayotimga hech kim aralashmasligini istayman. Muammolarimizni rafiqam bilan hal qilish ko`proq yoqadi. Qolaversa, bolalarimiz biz haqimizda hamisha yaxshi fikrda bo`lishi hammasidan muhimroq.
— O`g`lingiz Aarav bilan suhbatlashib turasizmi?
— Albatta, men qattiqqo`l ota emasman. Lekin Tinaning bolalarimizga nisbatan ma`lum ma`noda taqiqlari bor. Shuning uchun Aarav ko`pincha men orqali chegarani bosadi. Qizim Nitara hali yosh bo`lgani uchun vakolati bor. Aarav mening kasbimni hali to`liq tushunib etmagan. Ko`pincha u maktabdan dastxat so`rashganini aytadi. Menimcha, o`g`limga ommaning e`tiborida bo`lish unchalik yoqmaydi. U endi 12 yoshga kiradi, sal ulg`aysin keyin soham haqida unga kengroq ma`lumot beraman.
— Rafiqangiz jiddiy ayol. U bilan hazil va chinning chegarasini belgilab olganmisiz?
— Hayotimiz hamisha tinch va osuda, desam yolg`on bo`ladi. Aslida oilada qandaydir tushunmovchiliklarning bo`lishi tabiiy. Tina bilan yashash zavqli, rosti, usiz hayotimni tasavvur qila olmayman. Oilaviy dam olishlar, muhim sanalar, farzandlarimiz uchun maxsus kunlar uning hech qachon yodidan ko`tarilmaydi. Agar u meni ishga kuzatmasa nimamnidir uyda qoldirgandek his etaman.
— Komediyadan charchamadingizmi?
— Charchamadim! Lekin hozir “amplua”ni o`zgartirish vaqti kelganini sezyapman. Birxillik charxlanishga imkon bermaydi. Salbiy qahramonlarni o`ynagim kelyapti.
— Qaysi rejissyor sizdan ajoyib qahramon yasashiga ishonasiz?
— Sanjay Lila Bxansali! Uning taklifini ancha yillardan buyon kutayapman.
— Romantik edingiz...
— Hamon shundayman! “Titanik”ni qayta-qayta tomosha qilaman. Aytgancha, o`g`lim har safar “Dada, agar Keyt bo`lmaganida Leonardo cho`kmasdi”, deydi. Nimagadir u Rozani yoqtirmaydi.
— Bollivudda yaqin do`stlaringiz bormi?
— Yaqinlarim ko`p. Lekin qadrdonlarim - maktabdagi do`stlarim. Ular uchun men Akshay emasman, shunchaki Rajiv Bxatiyaman!
