Айни дамда Болгарияда 5 ёшли болакайнинг ўлими юзасидан тергов суриштирув ишлари олиб борилмоқда, дея хабар беради Вести.ру нашри.
Россия фуқароси бўлган ушбу болакайнинг жасади Парасель қишлоғидаги сув бўйидан ётган жомадон ичидан топилган. Жомадон шу жойдан ўтиб кетаётган йўловчилар томонидан топиб олинган. Болакай март ойининг ўрталарида ўлдирилган. Шу билан бирга унинг танасида кўплаб пичоқ излари борлиги айтилмоқда. Боланинг йўқолганлиги ҳақида полицияга ҳеч ким мурожаат қилмаган. Таҳминларга кўра, болакайнинг онаси ҳам топилган. Оила асли Россиянинг Перм шаҳридан бўлиб, сўнгги вақтларда Болгарияда истиқомат қилган.
Болгария полицияси ўлдирилган болакай ва унинг таҳминий онасининг суратларини тарқатди. Аниқланишича, 5 ёшли болакайнинг исми Никита Леоньтев бўлиб, онасининг исми Анна Леоньтева.
Айтиш керакки, яқинлагина Болгариянинг Приморск шаҳрида номаълум аёлнинг жасади топилган. Тасдиқланмаган маълумотларга кўра, бу аёл Никитанинг онаси бўлиши ҳам мумкин. Ҳозирга қадар биринчи ДНК экспертизаси ўтказилди, бироқ аёлнинг Никитанинг онаси экани ўз тасдиғини топмади. Эндиликда иккичи бор ДНК экспертизаси ўтказилиши кўзда тутилмоқда. Болакайнинг отаси ҳам Россиялик экани аниқланган, бироқ унинг Болгарияда бўлгани тасдиқланмаган. Маълумотларга кўра, Болгария ИИБ ушбу қотиллик юзасидан бир қатор таҳминларга эга, бироқ жиноятда гумон қилинаётган шахс йўқ. Қотиллик юзасидан Никитанинг онаси Анна Леоньтеванинг маблағ билан боғлиқ ишларига алоқадор бўлган шахс қидирилмоқда. Воқеалар ривожини кузатамиз.
