Таиландда велоспорт бўйича ўтказилган Осиё чемпионатида биттадан олтин ва бронза медалига сазовор бўлган терма жамоамиз аъзолари Ватанимизга қайтиб келдилар. Тошкент халқаро аэропортида ғолиб спортчиларимиз Ўзбекистон велоспорт федерацияси масъуллари, ОАВ ходимлари томонидан кутиб олинди, дея хабар беради olamsport.com нашри.
Аввал хабар қилганимиздек Таиланднинг Натхонратчасима шаҳрида бўлиб ўтган мазкур қитъа чемпионатида Тимур Гумеров кўпкураш (омниум) пойгаларида энг юқори натижага эга бўлиб, Осиё чемпионатининг олтин медали билан бирга 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмаси учун муҳим рейтинг очколарига эга бўлди.
Мазкур қитъа чемпионатининг ўсмирлар ўртасида ўтказилган мусобақаларида иштирок этган юртдошимиз Дилмурод Сиддиқов якунда бронза медали совриндори бўлди.
