2015 йилнинг 10-15 февраль кунлари Жанубий Кореянинг Сеул шаҳрида фигурали учиш бўйича тўрт қитъа (Осиё, Африка, Америка, Австралия) чемпионати ўтказилади. Бу ҳақда Ўзбекистон Миллий Олимпия қўмитаси матбуот хизмати хабар берган.
1999 йилдан буён анъанавий тарзда ўтказиб келинаётган мазкур нуфузли мусобақада эркаклар ва хотин-қизлар яккалик, жуфтлик ва муз устидаги рақс бўйича бўлиб ўтадиган баҳсларда ўз маҳоратларини намойиш этадилар.
Тўрт қитъа чемпионатининг бу йилги баҳсларида Ватанимиз шарафини тажрибали спортчимиз Миша Ге ҳимоя қилади. Йилдан-йилга тажриба ва маҳоратини тоблаб бораётган Миша Ге 2015 йилги мавсумни ҳам кўтаринки кайфиятда бошлаб, шахсий кўрсаткичларини янада юксалтиришни мақсад қилган.
Миша Ге тўрт қитъа чемпионатидан сўнг жорий йилнинг 23-29 март кунлари Шанхай шаҳри (Хитой)да ўтказиладиган жаҳон чемпионати баҳсларига тайёргарлик кўради.
Эслатиб ўтамиз, тўрт қитъа чемпионати тарихида ўзбекистонлик спортчилар орасида энг юқори натижа Татьяна Малининага тегишли. 1998 йили Нагано олимпиадасида 8-ўринни банд этган Татьяна Малинина 1999 йили илк бор ташкил этилган тўрт қитъа чемпионатида олтин медалга сазовор бўлган ва унинг номи мазкур нуфузли мусобақанинг хотин-қизлар ўртасидаги яккалик баҳсларнинг биринчи ғолибаси сифатида чемпионат тарихи саҳифаларига мухрланган.
