Шу кунларда пойтахтимизда давом этаётган “Competizione dell'Opera” опера ижрочиларининг XIV халқаро танловида финал иштирокчилар аниқланди.
Бир неча кундан буён дунёнинг турли қитъаларидан келган ёш истеъдод эгалари итальян тилида мумтоз опера асарларини ижро этиш бўйича ўзаро баҳслашмоқда. Уларнинг барчаси Вена (Австрия), Бонн (Германия), Пекин (Хитой), Сеул (Корея Республикаси), Буэнос-Айрес (Аргентина), Санкт-Петербург (Россия) ва бошқа шаҳарлар, шу жумладан, Тошкентда ўтказилган минтақавий саралаш босқичларида танлаб олинган.
Танловда Осиё, Африка, Европа ва Лотин Америкасидан 60 дан зиёд ёш ижрочи иштирок этмоқда. Ҳозирча иккинчи ярим финал босқичи ниҳоясига етган бўлиб, унда 30 дан ортиқ халқаро иштирокчи, жумладан, Ўзбекистоннинг 10 вакили қатнашди. Уларнинг деярли ярми финал босқичида иштирок этиб, финалда қатнашиш имкониятига эга бўлди, деб хабар бермоқда ЎзА.
Таъкидлаш жоиз, 2012 йилда ўтказилган мазкур танловида Ўзбекистондан биринчи бўлиб Алишер Навоий номидаги Ўзбекистон Давлат академик катта театри хонандаси Раҳим Мирзакамолов қатнашиб, биринчи ўринни эгаллади. 2013 йилдан бошлаб ташкилотчилар Тошкентни номзодларни тинглаб кўриш бўйича саралаш босқичлари ўтказиладиган шаҳарлар рўйхатига киритди. Жорий йилда Тошкент Марказий Осиёда биринчи бўлиб ўн тўртинчи марта ўтказилаётган «Competizione dell'Opera» танловига мезбонлик қилди.
