ArtReview журнали замонавий санъат оламидаги энг нуфузли шахслар анъанавий йиллик рейтингини эълон қилди. 2014 йилги рейтингда Тейт музейлари ва галереялари директори Николас Серота (Nicholas Serota) биринчи ўринни эгаллади. Серота 2002 йилдан бери ArtReview рейтингининг кучли ўнлигидан жой олиб келади, деб ёзади kun.uz
Рўйхатда иккинчи ўрин америкалик арт-дилер ва галереялар эгаси Дэвид Цвирнер (David Zwirner)га насиб этди. Учинчи ўринни эса швейцариялик галереячи Ивэн Вирт (Iwan Wirth) эгаллади.
«Николас Серота раҳбарлигида Тейт жаҳон санъат бозоридаги ҳақиқий вазиятни – асарларнинг тарқалиши уларни ишлаб чиқаришдан кўра муҳимроқ аҳамиятга эга эканлигини кўрсатиб бера олди. Тейт нафақат рассомларни, балки коллекционерларни ҳам тасдиқлайди», – дейилади журналдаги мақолада.
Тейт гуруҳи Тейт Модерн, Тейт Бритен, Тейт Сент Айвз, шунингдек, Тейт Ливерпулни бирлаштиради.
ArtReview’нинг 2013 йилги рейтингида Қатар амирининг синглиси, Қатар музейлар бошқармаси раҳбари Ал-Маясса бинт Ҳамад бин Халифа ал-Таний биринчи бўлганди.
Николас Серота 1988 йилдан бери Тейтга раҳбарлик қилиб келмоқда. Унинг қўл остида Тейт Модерн жаҳондаги энг кўп ташрифчига эга замонавий санъат музейига айланди. 2013 йили музейга 4,8 миллиондан ортиқ меҳмон ташриф буюрди. 2014 йили музейда тарихдаги энг кўп ташрифчига эга бўлган кўргазма бўлиб ўтди – Анри Матисснинг қоғоздан тайёрланган асарларини томоша қилиш учун 562,6 мингдан ортиқ киши келди.
