Ўзбек томошабинларига “Иван Всильевич ўз касбини ўзгартиради”, “Омадли жентельменлар” каби бадиий фильмлардаги бетакрор роллари билан таниш Савелий Крамаров ҳаёт бўлганида бугун 80 ёшни қарши олар эди.
Савелий Крамаров 1995 йили 6 июн куни Сан-Францискодаги клиникалардан бирида вафот этган.
Крамаров 1934 йили 13 октябрда Москва шаҳрининг Бауман туманида туғилган.
Савелий мактабни тугатгандан сўнг театр институтига киришга уриниб кўради, бироқ уни қабул қилишмайди. Таълимни давом эттириш учун у Москва ўрмончилик институтининг кўкаламзорлаштириш факультетига киради. У институтда ўқиб юрган пайтидаёқ, яъни 1954 йили “Биринчи қадам” театр студиясига киради.
1958 йили ўқишни тугатиб, бироз муддат мутахассислиги бўйича ишлайди. Ишни ташлашга қарор қилган Крамаров мамлакатнинг барча киностудияларига ўз расмларини юборади ва улардан бири жавоб қайтаради. Ана шундан кейин унинг актерлик фаолияти бошланади. Ҳақиқий муваффақият унга “Қўлга тушмас қасоскорлар” фильмидан кейин кулиб боқади. Унинг “Арвоҳлар чалғи ушлаб турибди. Ва жимжитлик!” ибораси жуда оммалашиб кетади.
1971 йили у “Омадли жентельменлар” фильмига суратга тушади.
1981 йили Александр Левенбук билан биргаликда у АҚШ президенти Рейганга хат ёзади. Хатда улар ўз ҳаётларидан нолишган эди.
Савелий Крамаров уч марта уйланган.
