Ҳиндистоннинг Уттаракханд штатида истиқомат қилувчи 56 ёшли Камла Деви уйига яқин жойдаги каналдан сув олаётган вақтида дарахтлар орасидан унга ташланган қоплонни қўлидаги белкурак билан ўлдирди. Бу ҳақда www.glunews.ru нашри хабар беради. Аслида аёлнинг ёнида ўроқ ва белкурак каби хўжаликда керак бўладиган анжомлар бўлган. Тасодифан ташланган қоплондан ҳимояланиш учун у ана шу анжомлардан ишлатишга мажбур бўлган.
“Қоплон билан чамаси ярим соат давомида тўхтовсиз олишдим. Аввалига жуда қўрқиб кетдим, куним битди деб ҳам ўйладим, бироқ қўлимдан келганча ўзимни ҳимоялашга уриндим” – дейди Камла Деви.
Маълумотларга кўра, аёлнинг ўнг қўли икки жойидан синган, бундан ташқари танасининг турли жойларида қоплон тишлари қолдирган жароҳатлар бор.
Ҳиндистонда бундай ҳолатлар доимий равишда кузатилади. Ушбу ҳодиса ўтаётган ҳафтада қоплонлар ҳамласи билан боғлиқ иккинчи ҳолатдир.
