Сурия президенти Башар Асаднинг расмий вакили Бутайба Шаъбон америкалик журналист Жеймс Фоули ўтган йили қатл этилганлигини маълум қилди.
Унинг айтишича, видео яқиндагина намойиш қилинишига қарамай, журналист ўтган йили ўлдирилган ва бу ҳақда БМТнинг хабари бор.
“Журналист Сурия озод армияси томонидан қўлга олинган, кейинчалик эса номини “Ироқ ва Шом ислом давлати”дан “Ислом давлати”га ўзгартирган гуруҳга сотиб юборилган. Бу маълумотни БМТда текшириб кўришингиз мумкин”,-деди Бутайба Шаъбон.
“Интерфакс” агентлигининг ёзишича, Шаъбон тақдим этган маълумотлар, озодликка чиққан асирларнинг бир неча ой аввал Фоулини тириклигини кўришгани ҳақидаги гапларига тўғри келмайди.
Эслатиб ўтамиз, 20 август куни аввал ижтимоий тармоқларда америкалик эркин журналист Жеймс Фоулни қатл этиш жараёни акс этган видеолавҳа пайдо бўлганди.
