Ҳар биримизнинг гардеробимизда ҳеч бўлмаганда бир дона жинси матоли кийим бор. Кўпчилик уй бекалари уни дазмоллаш керак ёки керак эмаслиги ва қандай дазмол қилиниши ҳақида иккиланадилар. Қуйида кичик қоидалар эса сизга бу борада асқотади.
1. Биринчи навбатда, жинси кийимни дазмоллашдан олдин унинг ёрлиғини ўқиб чиқинг. У ерда неча даражада қиздирилган дазмол билан дазмолланиши кераклиги ҳақида маълумот берилади. Жинси матосининг ҳам турлари кўп, ҳар бирида турли хил ҳароратда дазмол қилинади. Баъзи ҳолларда эса дазмол қилиш умуман тавсия этилмайди.
2. Агар дазмол қилиш мумкин бўлса, дазмолни тавсия этилган ҳароратга созлаб ишни бошланг. Ювилган шимни бутунлай қуришини кутманг, озгина нам кийимлар яxши текисланади. Жинси кийимни тескарисидан дазмолланг, шунда ялтирашининг олдини оласиз.
3. Албатта дока ишлатинг, шунда кийимнинг дазмол олмаган жойи қолмайди. Ювилган, аммо ғижим бўлиб қолган кийимга пуркагичли идишда сув сепиб дазмолланг.
4. Дазмол ҳароратини бир маромда ушлаб туринг, юпқароқ жинси матолар учун 150 даражада қиздирилган дазмол, қалинроқлари учун эса бундан юқорироқ ҳарорат тавсия этилади. Дазмолдан сўнг кийимни дарров кийманг, уни бутунлай совушига қўйиб беринг, акс ҳолда шимнинг тиззалари, устки кийимларнинг эса тирсаклари бўртиб чиқиб қолади.
5. Кўпчилик ишлаб чиқарувчилар жинси матосидан тикилган кийимлар тўғри ювиб, тўғри қуритилса, дазмол қилишга эҳтиёж туғилмаслигини уқтиришади. Бундай натижага эришиш учун уларни илиқ 40 даражагача бўлган сувда ювинг. Кир ювиш машинасида ювсангиз, оқартирувчисиз кукундан фойдаланинг. Қўлда ювиш учун энг яxшиси кир совун.
6. Қўлда ювганда қаттиқ сиқманг, шунчаки номига сувини сирқитинг. Кир ювиш машинасида сиқувни 600 дан кўпга қўя кўрманг. Лекин агар иложи бўлса, ювиб бўлгандан сўнг қўлда олиб сиқа қолинг.
7. Шамол яхши айланадиган хонага аввал яxшилаб қоқиб, қўлингиз ёрдамида текислаб, ёйиб қўйинг.
Манба: «Sug'diyona» газетаси
