Хоразм вилояти Урганч шаҳрида ака-укалар этил спиртидан заҳарланиш оқибатида вафот этди, деб хабар қилди вилоят ИИБ матбуот-хизмати.
Хабарда айтилишича, Урганч шаҳридаги кўп қаватли уйларнинг бирида оиласиз, фақат ўзлари истиқомат қилган ака-укалар: 1961 йилда туғилган М.Раҳимжон ва 1963 йилда туғилган И.Мурадларнинг 2-3 кундан буён кўча-кўйда кўринмай қолганлигидан шубҳаланган қўшнилари 2017 йил 17 октябрь куни ички ишлар бўлимига хабар беришди.
Ҳодиса жойига зудлик билан етиб келган тергов-тезкор гуруҳи аъзолари хонадон эшигини очиб киришгач, ака-укани ўз уйида ўлик ҳолда топишган. Мурдаларнинг танасида ҳеч қандай жароҳат излари йўқлиги сабабли тезкор ходимларнинг диққатини шу ерда турган тиббиёт этил спиртининг бўшаган иккита пластик идиши тортди.
Ўтказилган суд-тиббий экспертизаси хулосасига кўра, ака-укалар этил спиртидан заҳарланиши натижасида вафот этишганлиги аниқланган.
Ҳолат юзасидан прокуратура органлари томонидан суриштирув ишлари олиб борилмоқда.
