Ўзбекистонда чиқинди белгиланмаган жойларга ташланиши ортидан бир кунда салкам 225 млн сўм жарима белгиланди. Бу ҳақда Экология вазирлиги хабар берди.
Маълум қилинишича, Республиканинг барча ҳудудларида белгиланмаган жойларга чиқинди ташлаш билан боғлиқ 328 та ҳолат аниқланди. Ҳуқуқбузарларга нисбатан жами 224,36 млн сўм миқдорида жарима белгиланган.
Президент топшириғига кўра, бутун республикада тозалик ва озодалик ойлиги давом этмоқда. Бунда барча ҳудудларда ободонлаштириш ишлари олиб борилмоқда, маҳаллалар, кўчалар, ариқлар, таълим муассасалари ва бошқа объектлар чиқиндилардан тозаланмоқда.
Экология вазирлиги, Бош прокуратура, Миллий гвардия ва Ички ишлар ходимларидан иборат ишчи гуруҳ томонидан доимий назорат олиб борилмоқда ва белгиланмаган жойларга чиқинди ташлаганларга нисбатан қонунчиликка кўра қатъий чоралар кўрилмоқда.
