АҚШнинг президенти Дональд Трамп Мичиган штатининг Уоррен шаҳрида ўз тарафдорлари олдида нутқ сўзлади. Унда у ўзининг иккинчи президентлик муддати бошлангач, биринчи 100 кунни “АҚШ тарихидаги энг муваффақиятли давр” деб атади.
Трампнинг айтишича, яқин ҳафталар ва ойларда унинг маъмурияти “Америка тарихидаги энг йирик солиқ пасайишини” эълон қилади. “Американи олтин давр кутмоқда — арзон нархлар, юқори маошлар ва дунёдаги энг кучли иқтисодиёт”, — дейди у.
Нутқ давомида Трамп АҚШ автомобилсозлик саноатини алоҳида тилга олди ва янги солиқ имтиёзлари туфайли жаҳон компаниялари ўз заводларини айнан АҚШда очишга интилишини таъкидлади.
Дональд Трамп ўзининг 47-президент сифатида эришган ютуқлари қаторида инфляция пасайиши, ноқонуний миграцияга қарши кураш ва “вочилик мафкураси”га қарши чиқишни санаб ўтди. Сиёсий рақиблари — демократларни у “жиннилар” ва “жиноятчилар” деб атади. Шунингдек, “чап қанот судьялари” ва “холис бўлмаган ОАВ”ни ҳам кескин танқид остига олди.
Миграция масаласига тўхталар экан, Трамп ноқонуний муҳожирларни чиқариб юбориш борасидаги ваъдасини яна бир бор эслатди. “Бу нафақат менинг сайловолди ваъдам, бу — Бош қўмондон сифатидаги муқаддас бурчим. Мен мамлакатимизни қутқаришга мажбурман”, — дейди у.
Сўнгги социологик сўровномалар Трампга бўлган ишонч ҳозирда АҚШ фуқароларининг атиги 40 фоизини ташкил этаётганини кўрсатмоқда. Бироқ Трамп бу рақамларни рад этиб, уларни “сохта” деб атади ва аслида 60 фоиз америкалик уни қўллаб-қувватлаётганини таъкидлади.
