Тошкент шаҳри Яккасарой туманидаги Askiya city турар жой қурилиш майдончасида эркак зинапоядан йиқилиб вафот этгани ҳақида хабар бергандик. Қурилиш вазирлигининг маълум қилишича, ушбу қурилиш ноқонуний равишда олиб борилган.
Хусусан, 2020 йил май ойида мазкур объектда олиб борилаётган қурилиш ишлари Вазирлар Маҳкамасининг тегишли қарорига зид экани аниқланган. Яъни ишлар Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекциясини хабардор қилмаган ҳолда ва белгиланган тартибда рўйхатдан ўтмаган тарзда бошланган.
2020 йил 27 майда инспекция томонидан қурилиш ишларини тўхтатиш бўйича ёзма кўрсатма берилган. Маъмурий жавобгарликка тортилган ҳамда қурилиш-монтаж ишлари тўхтатилган.
Лекин 2024 йил 26 апрель куни олиб борилган қайта текширув жараёнида ишлар давом этаётгани аниқланган ва қурилиш масъуллари чақиртирилган. Аммо улар қурилиш объектига келмаган ва талаб қилинган ҳужжатлар тақдим этилмаган.
Шу сабабли мазкур ҳолат юзасидан маҳалла профилактика инспектори иштирокида далолатнома расмийлаштирилган ҳамда тегишли текширув ишлари якунланган. Ҳолатга ҳуқуқий баҳо бериш учун тегишли ҳуқуқ-тартибот органларига даъво аризалари киритилган.
Бугунги кунда Тошкент шаҳар ИИББ ҳузуридаги тергов бошқармаси томонидан ушбу объект бўйича жиноят иши очилган. Шунингдек, объектда барча турдаги қурилиш ва монтаж ишлари тўхтатилган.
