Стокгольм шаҳрида Ўзбекистоннинг Швециядаги биринчи Фавқулодда ва Мухтор Элчиси, аввал мамлакатимизнинг ушбу давлатдаги Муваққат ишлар вакили сифатида ишлаган Нодир Ғаниев ўз вазифасини бажаришга киришди, деб хабар бермоқда "Дунё".
Нодир Ғаниев 52 ёшда. У Тошкент давлат университети (ҳозирги Ўзбекистон Миллий университети)нинг шарқшунослик факультетини тамомлаган. 1994 йилдан буён Ташқи ишлар вазирлиги тизимида фаолият юритиб, марказий аппарат ва мамлакатимизнинг хориждаги дипломатик ваколатхоналарида турли лавозимларда ишлаган.
Швецияга жўнаб кетишидан олдин у ТИВнинг Европа давлатлари ва Европа Иттифоқи институтлари билан ҳамкорлик бошқармаси бошлиғи лавозимида фаолият олиб борган.
Эслатиб ўтамиз, мамлакатимизнинг Стокгольмдаги дипломатик ваколатхонаси 2022 йилда очилган ва Ўзбекистоннинг хорижий давлатлардаги 36-элчихонаси бўлди.
