Санитария-эпидемиологик осойишталик ва жамоат саломатлиги хизмати бустер доза билан эмлаш қандай тартибда амалга оширилиши ҳақида маълумот берди.
Таъкидланишича, бустер доза билан эмланувчи контингентга тўлиқ вакцина курсини якунлаган, ўз навбатида вакцинанинг биринчи дозасини олганига 6 ой ва ундан ортиқ вақт ўтган аҳоли қатлами киради.
Бустер доза олмоқчи бўлган аҳоли республиканинг барча даволаш профилактика муассасаларнинг эмлаш пунктларида эмланишлари мумкин.
Эмлаш пунктида бустер дозани вакцинанинг ҳар қандай туридан фойдаланган ҳолда олиши мумкин.
Таҳлилларга кўра 2021 йил 1 апрелидан 1 августигача бўлган муддат оралиғида биринчи доза вакцина билан эмланган фуқаролар февраль ойигача биринчи дозасини олганига 6 ой ва ундан ортиқ вақт ўтган аҳоли қатламига кириб, улар 5,2 млн. нафарни ташкил этади. Шундан 733,8 минг нафари бугунги кунгача бустер доза билан эмланган.
Мутахассисларнинг фикрича бустер доза вакцина билан эмланиш “альфа”, “дельта” штаммларидан ташқари “омикрон” штамми билан чақирилган COVID-19 касаллигидан ҳам ҳимоя қила олади. Мабодо касаллик юқиб қолгудек бўлса ҳам у жиддий асоратларсиз, енгил ўтиб кетади.
Бир қатор мамлакатлар тажрибаси ҳамда Жаҳон соғлиқни сақлаш ташкилотининг тавсияларига кўра, коронавирус касаллиги авж олишини бир неча маротабага камайтириш ва ўлим ҳолатларини олдини олишда ягона ҳамда зарурий чора аҳоли орасида жамоавий иммунитет таранглигини мунтазам равишда барқарор ушлаб туриш учун вакцинация (2 ва 3 маротаба эмланиш) тадбирларини жадаллаштириш ва бустер доза билан эмлаш эканлиги айтилмоқда.
