Наманган вилоятининг Косонсой туманидаги 13-умумтаълим мактабининг информатика фани ўқитувчиси Раҳимжон Фозилов ойлиги 1000 доллардан ошди. Бу ҳақда Наманган вилоят халқ таълими бошқармаси Ахборот хизмати хабар бермоқда.
Унга кўра, Фозилов 15 йиллик педагогик тажрибага эга бўлиб, мактабнинг ўзидан 7 млн сўм маош олади. Ўз устида тинимсиз изланишдан чарчамайдиган ўқитувчи, шунингдек, қўшимча ўқув курси ташкил қилган бўлиб, ўқувчиларга информатика ва математика фанларини чуқур ўргатиб, олий таълимга тайёрламоқда. Мингга яқин ўқувчига замонавий билимларни пухта ўргатиб, истиқбол сари дадил етаклаётган моҳир муаллим ушбу қўшимча машғулотдан ойига 6 млн сўм даромад топмоқда.
"Косонсойнинг энг чекка ҳудудида фаолият юритаётган ташаббускор ўқитувчининг изланишлари нафақат тумандаги, балки бутун вилоят миқёсидаги ҳамкасбларига ибрат ва ўрнак", - дейилади хабарда.
