Аввалроқ Самарқанд вилояти Каттақўрғон туманида солиқ инспекцияси бошлиғи 1-ўринбосари А.А ИИБ ходимлари билан бўлган вазиятда вафот этгани ҳақида хабар қилинган эди.
Шундан сўнг мазкур ҳолат бўйича жиноят иши қонуний кўриб чиқиш учун Каттақўрғон туман судига юборилган эди.
Кейинроқ Олий суд матбуот хизмати берган хабарга кўра, мазкур солиқ инспекцияси мулозимининг вафотида айбланган икки нафар ИИБ ходимига нисбатан суд хукми ўқилган.
Шундан сўнг, 2021 йил 3 декабрь куни, жиноят ишлари бўйича Каттақўрғон туман суди биносида судланувчилар М. Кучкаров (1987 йилда Самарқанд вилоятида туғилган, Каттақўрғон тумани ИИБ йўл ҳаракати хавфсизлиги бўлинмаси бошлиғи лавозимида ишлаган) ва Ш. Рахимбердиев (1990 йилда Самарқанд вилоятида туғилган, Самарқанд вилояти ИИБ ЙҲХБ ЙПХБ 4-отряд катта инспектори лавозимида ишлаган) га нисбатан жиноят ишини кўриб чиқиш бўйича очиқ суд жараёни ниҳоясига етди ва суд ҳукми эълон қилинган эди.
Кеча, 2022 йил 31 январь куни, Самарқанд вилоят судининг жиноят ишлари бўйича судлов ҳайъатида ушбу жиноят иши бўйича судланувчи М. Кучкаров ва унинг ҳимоячиси – адвокат Ш. Махаммадиев ҳамда жабрланувчи И. Жамолов томонидан келтирилган апелляция шикоятларини кўриб чиқиш бўйича суд жараёни ниҳоясига етиб, апелляция инстанциясининг ажрими қабул қилинди.
Унга кўра М. Кучкаров ва Ш. Рахимбердиев ўз мансаб ваколатларидан четга чиқиши ва белгиланмаган тартибда ҳаракат қилишлари натижасида эҳтиётсизликдан А. Ахмедовнинг ўлимига сабабчи бўлганлиги ҳолати судлов ҳайъати мажлисида сўралган суд-тиббий эксперти ва гувоҳларнинг кўрсатувлари ҳамда жиноят ишида мавжуд суд-тиббий экспертиза хулосаси, мурдани, автомашинани ва ҳодиса жойини кўздан кечириш баённомаси, боди-камераси ёрдамида ёзиб олинган видео ёзувлар ва уларнинг стенограммаси, хизмат текшируви хулосалари, тушунтириш хатлари ва бошқа инкор қилиб бўлмайдиган далиллар билан ўз тасдиғини топганлиги сабабли жиноят ишлари бўйича Қўшработ туман судининг 2021 йил 3 декабрдаги судининг ҳукми ўзгаришсиз, келтирилган апелляция шикоятлари қаноатлантирлмасдан қолдирилди.
Мазкур ажримдан норози тарафлар қонунчиликда белгиланган тартиб ва муддатда Олий суднинг Жиноят ишлари бўйича судлов ҳайъатига кассация шикояти (протест) келтиришга ҳақли эканлиги маълум қилинади.
