Amerikalik olimlar tadqiqotlar yordamida ayollar va erkaklarda intellektual salohiyat mutlaq teng ekanligini isbotladi. Bu haqda “trkterra.ru” sayti xabar bermoqda.
Bosh miyaning IQ-imkoniyatlarga javobgar qismi har ikki jins vakillarida bir xil ekanligi o`z isbotini topdi. Rozalind Franklin nomidagi fan va tibbiyot universiteti ilmiy xodimlari 6000 kishidan iborat ko`ngillilarni MRT-skanerdan o`tkazishdi. 76 ta turli tadqiqotlar jarayonida barcha ma`lumotlar o`rganildi.
Tadqiqot natijalariga ko`ra, miyaning xotira uchun javobgar hisoblanuvchi gippokamp qismi ikki jins vakillarida ham bir xil. Faqat ayrim hollardagina kichik tafovutlar kuzatilishi mumkin.
Shu tarzda olimlar ko`p yildan beri erkaklar ayollarga nisbatan aqlliroq degan stereotip haqiqatdan yiroq ekanligini isbotlashga muvaffaq bo`lishdi. Bundan tashqari, insonning IQ-imkoniyatlari uning jinsiga emas, balki tarbiyasi, genetik xususiyatlari va atrof-muhitga bog`liq ekanligi ham ma`lum bo`ldi.
