O`tgan 2019 yil yakunida Prezidenti Shavkat Mirziyoev poytaxtdagi Muhammad al-Xorazmiy nomidagi maktabda yoshlar bilan uchrashgandi va unda yoshlar siyosati bo`yicha qator tashabbuslar ilgari surildi. Yoshlar hayotidagi muammolar, dolzarb vazifalar muhokama qilinib, bugungi kunda ularni qiynayotgan eng muhim masalalar yuzasidan mutasaddilar oldiga qator vazifalar qo`yilgan edi.
Prezident tomonidan belgilab berilgan vazifalar ijrosini ta`minlash maqsadida Qashqadaryo viloyati hokimligida yoshlar muammolarini o`rganish, bartaraf etish va ularning jamiyatda o`z o`rinlarini topishiga ko`maklashish masalalariga bag`ishlangan muhokama yig`ilishi bo`lib o`tdi. Bu haqda viloyat hokimligi Axborot xizmati rahbari Axror Sodiqov xabar bermoqda.
Yig`ilishda viloyat hokimi so`z olib, endilikda viloyat, tuman va shahar sektor rahbarlari ish haftasining bir kunini “Yoshlar masalalarini echish kuni” etib belgilash taklifini berdi.
- Yoshlar bilan ishlash tizimini an`anaga aylantirishimiz kerak, - deya ta`kidladi viloyat hokimi. – Bu tizimni an`anaga aylantira olsak, “Hokim va yoshlar” va “Sektor va yoshlar” uchrashuvlari ham doimiy yo`lga qo`yilishiga, yoshlarimizni bandligi va ijtimoiy muammolarini bartaraf etilishiga erishamiz.
Shuningdek, yig`ilishda iqtidorli yoshlar ro`yxatini shakllantirish, xatlov natijalariga ko`ra, aniqlangan ishsiz yoshlarni ish bilan ta`minlash maqsadida dastur ishlab chiqish, har bir ishsiz yoshga tashkilot rahbarlari va deputatlarni biriktirish tizimini yaratish bo`yicha ham viloyat hokimi tegishli tashkilotlarga topshiriqlar berdi.
