19 dekabr kuni Rossiya Prezidenti Vladimir Putin yillik matbuot anjumanida qatnashib, jurnalistlarning savollariga javob berdi. Bu haqda tarjimon.uz xabar bermoqda.
Rossiyaning Britaniya siyosatiga aralashgani haqidagi savolga javob berar ekan, Putin:
«Rossiyaning Britaniya ishlariga aralashgani yoki aralashmagani to`g`risida gapiradigan bo`lsak, biz turli mamlakatlardagi rasmiy boshqaruv organlaridan, shu jumladan Britaniyadan ham, Rossiyada sodir bo`layotgan voqealarni baholash to`g`risidagi fikrlarni ko`p eshitganmiz. Bu o`zga mamlakat ishlariga aralashuvmi? Agar siz bu aralashuv deb o`ylasangiz, unda shunday deb o`ylashda davom eting. Ammo bu holatning boshqa davlat ishlariga aralashishga umuman aloqasi yo`q” deya bu ayblovlarni rad etdi.
Shuningdek, Putin Buyuk Britaniya Bosh Vaziri Boris Jonsonni boshqa amaldorlardan ko`ra Britaniya jamiyatining Breksit bo`yicha holatini yaxshiroq anglashini maqtab, u haqda bir qancha iliq fikrlar bildirib o`tdi.
«Hozir Britaniyanda bo`layotgan ishlarga kelsak, Jonsonni tabriklash mumkin. U, bu oyda bo`lib o`tgan saylovda g`olib chiqdi va Britaniya jamiyatidagi kayfiyatni raqiblaridan ko`ra yaxshiroq tushundi. U Breksit bo`yicha o`zining barcha rejalarini amalga oshirish niyatida», dedi Putin.
London va Moskva o`rtasidagi munosabatlar 2018 yildan beri tarangligicha qolmoqda. O`shanda bu mamlakatlar o`rtasidagi kelishmovchilikka Angliyada sobiq rus ayg`oqchisi va uning qizining zaharlanishi sabab bo`lgandi.
