Navoiy viloyati Zarafshon shahridagi Yoshlik mahallasi ichki ishlar organlari tayanch punktlarining profilaktika inspektori, leytenant Shuhrat Muhamedovga hududda yashovchi fuqaro murojaat qiladi.
Murojaatda A.Azlarov tanishi J.Abdusattorovni (ism va familiyalar o`zgartirilgan) bir ayol bilan nikohlagani bildiriladi. Masalaning yomon tomoni, J.Abdusattorovning oilasi borligini bila turib A.Azlarov yashirincha nikoh o`qiydi.
Dastlabki surishtiruvlarga ko`ra, barchasi o`z isbotini topadi. Qilmishining misi chiqqan A.Azlarov xavotirga tushib, ishni bosti-bosti qilish chorasini izlaydi. Profilaktika inspektori, leytenant Shuhrat Muhamedovga 500 ming so`m pora taklif qiladi.
Navoiy viloyati ichki ishlar boshqarmasi matbuot xizmatining xabar berishicha, profilaktika inspektorining bildirgisi asosida shu kunning o`zidayoq o`tkazilgan tezkor tadbir natijasida fuqaro A.Azlarov 300 ming so`m miqdoridagi pullarni pora sifatida berayotgan vaqtida ashyoviy dalil bilan qo`lga olinadi. Mazkur holat yuzasidan 2018 yil 5 sentyabr kuni fuqaro A.Azlarovga nisbatan O`zbekiston Respublikasi Jinoyat kodeksining tegishli moddasi bilan jinoyat ishi qo`zg`atildi, deb yozmoqda O`zA.
Darhaqiqat, O`zbekiston Respublikasining “Korrupsiyaga qarshi kurashish to`g`risida”gi qonuni ijrosini ta`minlashda Ichki ishlar vazirligi ham korrupsiyaga qarshi kurashish bo`yicha faoliyatni bevosita amalga oshiruvchi davlat organlaridan biri hisoblanadi.
Bugungi kunda vazirlik tizimida xizmat olib borayotgan xodimlarning faoliyatida poraxo`rlik va tamagirlik bilan bog`liq salbiy holatlarning oldini olish bo`yicha bir qator ishlar amalga oshirilmoqda. Xizmat faoliyatini suiiste`mol qilib, pora olganligi aniqlangan xodimlarga nisbatan qonun talablari asosida murosasiz choralar ko`rilmoqda. Shu bilan birga, tizimdagi xodimlar orasida o`z vazifasiga sidqidildan yondashib, xizmat burchini barcha narsadan ustun qo`yadigan xodimlar doimiy ravishda munosib rag`batlantirib kelinmoqda. Bu esa soha xodimlarini vatanparvarlik, el-yurtga sodiqlik ruhida xizmat olib borishida muhim omil bo`lmoqda.
Xususan, o`z xizmat vazifasiga vijdonan va sidqidildan yondashib, qonunchilik buzilishining oldini olish, fuqarolar orasida ichki ishlar organlari xodimlariga nisbatan bo`lgan ishonchning mustahkamlanishiga munosib hissa qo`shganligi hamda yuksak kasb mahoratini namoyon etganligi uchun mahalla profilaktika inspektori leytenant Shuhrat Muhamedov 2 million so`m pul bilan mukofotlandi.
