“Telegram" Bosh prokuraturaga arz qiladi

“Telegram" advokati Pavel Chikovning ijtimoiy tarmoqlardagi qaydlariga asoslanib, messenjer yuristlari “Roskomnadzor” ustidan Rossiya Federasiyasi Bosh prokuraturasiga arz qilmoqchi.

Pavel Chikovning qaydlariga ko`ra “Telegram" manfaatlarini himoyalovchi tashkilot “Agora”ga messenjer bloklangani uchun o`z saytlariga kirish ruxsatini yo`qotgan 73 nafar kishi murojaat qilgan. Advokat shu kabi hollarda ko`rilgan zararni aniqlash va sudga murojaat qilish qo`llanmasini e`lon qilganini ham bildirgan.

Chikov “Telegram" yuristlarining RF Bosh prokuraturasiga arz qilish muddatini joriy yilning may oyi boshiga to`g`ri kelishiga ishora qilgan.

Eslatib o`tamiz, shu yilning 13 aprelida Moskva shahrining Tagan tuman sudi Rossiya Fedaral xavfsizlik xizmatiga shifrlash kalitlarini berishdan bosh tortgani uchun “Telegram"ni Rossiyada bloklash bo`yicha “Roskomnadzor” kiritgan da`voni qanoatlantirgan edi. Sud qaroriga ko`ra 16 apreldan “Telegram" Rossiyada bloklana boshlandi. Keyinchalik messenjer blokni chetlab o`tish uchun “Amazon” va “Google”ning IP-manzillaridan foydalanganligi haqida xabar tarqaldi. Shundan so`ng “Roskomnadzor” “Telegram"ni bloklash uchun barcha choralarni ko`rishi, kerak bo`lsa messenjerning ishlashiga yordam beruvchi internet resurslar faoliyatini ham cheklashini ma`lum qildi.