Prezident nutqida qayd etilishicha, bugungi kunda O‘zbekistonda xotin-qizlarning huquq va manfaatlarini ta’minlash bo‘yicha yangi tizim shakllantirilgan. Endilikda ayollar manfaatlariga ta’siri baholanmasdan turib biror qonun qabul qilinmaydi.
Davlat rahbarining ta’kidlashicha, so‘nggi yillarda mamlakatda 230 mingga yaqin ayol tadbirkorlar shakllangan, 12 ming nafar fermer ayol faoliyat yuritmoqda, 6 mingdan ortiq olima ilm-fan rivojiga hissa qo‘shmoqda. Shuningdek, o‘tgan yili sport musobaqalarida o‘zbekistonlik qizlar 167 ta oltin, 193 ta kumush va 243 ta bronza medalni qo‘lga kiritgan.
Nutqda ayollar bandligini ta’minlash masalasiga alohida e’tibor qaratildi. Ma’lum qilinishicha, o‘tgan yili xotin-qizlar tadbirkorligini qo‘llab-quvvatlash uchun 23,5 trillion so‘m kredit ajratilgan va bu orqali 425 mingdan ortiq ayol biznesga jalb qilingan.
Prezidentga ko‘ra, joriy yilda 166 ming nafar ayol zamonaviy kasb va tadbirkorlikka, yana 100 ming nafari IT sohasiga o‘qitiladi. Bundan tashqari, "Daromadli ayol" dasturi orqali 50 ming nafar xotin-qizning bandligi ta’minlanadi, "Hamroh" dasturi doirasida esa ayollarning 3 mingta loyihasiga jami 1 trillion so‘m mablag‘ ajratiladi.
Shuningdek, yangi o‘quv yilidan ehtiyojmand oilalardagi qizlar uchun davlat grantlari soni ikki baravar oshirilib, 4 mingtagacha yetkazilishi bildirildi. Yana bir tashabbusga ko‘ra, ayollarning innovatsion g‘oyalarini qo‘llab-quvvatlash uchun har yili kamida 10 ta yo‘nalishda startap tanlovlari o‘tkazilib, har bir yo‘nalish g‘olibiga 500 million so‘mgacha grant beriladi.
Prezident nutqida ayollar va bolalarga nisbatan zo‘ravonlikka qarshi murosasiz muhit yaratish strategik vazifa ekani ham qayd etildi. Shu bilan birga, jazoni ijro etish muassasalarida jazo o‘tayotgan ayollarni ijtimoiy hayotga qaytarish maqsadida "Yangi hayot" dasturi yo‘lga qo‘yilishi ma’lum qilindi.
