Toshkent viloyatining Yangiyo`l tumani hududidan o`tuvchi magistral yo`lda mudhish yo`l-transport hodisasi yuz berdi.
Bu haqda Facebook`ning “Voditeli Tashkenta” guruhida xabar qoldirildi. Xabarga ilova qilingan suratlarda yo`l chetiga ag`darilib ketgan Nexia avtomobilining olov ichida qolib ketganini ko`rish mumkin. YTHning boshqa ishtirokchilari esa suratlarda ko`rinmagan.
Yo`l-transport hodisasi oqibatida jabrlanganlar bo`lishi mumkin. Biroq ijtimoiy tarmoqqa YTH haqidagi ma`lumotni joylagan internet foydalanuvchisi jabrlanganlar haqida ma`lumot keltirmagan.
“Voditeli Tashkenta” guruhi a`zolari yo`l-transport hodisasi avtomobilni katta tezlik bilan boshqarish oqibatida yuzaga kelganini taxmin qilmoqda. Aksariyat foydalanuvchilar Nexia`ga o`rnatilgan gaz balloni portlashi natijasida avtomobilning yonib ketgan bo`lishi mumkinligini ham ta`kidlamoqda.
