Франциянинг Марсель шаҳрида “Open 13” деб номланган теннис турнирининг асосий тўр баҳслари давом этмоқда. ATP таснифидаги ушбу нуфузли турнирнинг мукофот жамғармаси 565 минг 735 еврони ташкил қилади, дея хабар беради olamsport.com нашри.
Хабар берганимиздек, ушбу мусобақада ҳамюртимиз Денис Истомин ҳам иштирок этяпти. Яккаликнинг илк даврасида хорватиялик Борна Чоричга 4:6, 5:7 ҳисобида имкониятни бой берган ҳамюртимиз энди бор эътиборини жуфтликдаги иштирокига қаратган.
Денис жуфтликлар беллашувининг илк даврасида қозоғистонлик Андрей Голубев билан бирга Буюк Британия ва Австралия вакиллари Жейми Маррей ҳамда Жон Пирсни қийинчилик билан уч сет натижасига кўра 7:5, 6:7, тай-брекда 10:7 ҳисобида мағлуб этди. Бугун Истомин ва Голубев чорак финалга чиқиш учун чехиялик Лукаш Росол ҳамда австриялик Доминик Тим жуфтлигига қарши кортга чиқади.
