2014 йилда ёшларни тадбиркорлик фаолиятига кенг жалб этишга йўналтирилган “Менинг бизнес ғоям” лойиҳасида ғолиб чиққан 28 кишига 312 миллион сўмдан зиёд микрокредит олиш учун сертификат берилди, дея хабар беради uz24.uz ЎзА маълумотларига таянган ҳолда.
Таъкидлаш керак, Ўзбекистон Савдо-саноат палатаси ва унинг бўлимлари томонидан жамоат ташкилотлари билан ҳамкорликда Тадбиркорлар кунлари ўтказиб келинмоқда. 2014 йилда бундай тадбирларда 100 мингдан зиёд тадбиркорлик субъекти иштирок этди. Турли масалалар бўйича улардан келиб тушган 14 мингдан ортиқ мурожаатнинг аксарият қисми кўриб чиқилди.
Шунингдек, палата томонидан тадбиркорларимизнинг чет эллик шериклар билан ҳамкорлигини кенгайтиришга кўмаклашилаётганини ҳам таъкидлаш жоиз. Жумладан, 2014 йилда тўғридан-тўғри чет эл инвестициясини жалб қилиш мақсадида Савдо-саноат палатаси хорижий капитал иштирокидаги 56 корхонани ташкил этишга ёрдам берди.
2015 йилда ҳам палата томонидан оилавий тадбиркорликни ривожлантириш учун қулай ишбилармонлик муҳитини яратиш, маҳсулотлар ишлаб чиқариш ва товарлар экспорти, шунингдек, “ягона ойна” тамойили бўйича хизмат кўрсатиш ҳажмини кенгайтириш ва электрон тижоратни ривожлантириш кўзда тутилган. Бу ҳақда Савдо-саноат палатасининг Тошкентда бўлиб ўтган йиғилишида маъдум қилинди.
