Биз Австралияга Осиё чемпионати гуруҳ босқичидан чорак финалга чиқиш ва совринли ўринларга даъвогарлик қилиш мақсадида йўл олган эдик. Хитой билан ўйинни ҳисобга олмаган ҳолда йигитларимиз рақибларига муносиб қаршилик кўрсатишди.
Аммо Осиё чемпиони Жанубий Корея билан учрашувда терма жамоамиз аъзолари тактик ва жисмоний жиҳатдан рақибларидан кам эмаслигини кўрсатишсада, омад биздан юз ўгирди. Футболчиларимиз кўп ҳолларда вазиятлардан унумли фойдапланиша олмади. Бунинг учун мен мухлислардан узр сўрайман, – деди футбол бўйича Ўзбекистон терма жамоаси бош мураббийи Миржалол Қосимов. – Аммо жаҳон чемпионатининг саралаш учрашувларида чиройли ўйин намойиш этиб мухлислар ишончини қозонишга ҳаракат қиламан. Йигитларнинг маҳоратини ошириш учун 27 март куни Жанубий Корея билан, 31 март куни Япония билан ўртоқлик учрашувини ўтказамиз.
Терма жамоанинг мураббий директори Асқар Толибжоновнинг айтишича, Ўзбекистон Футбол Федерациясининг йиғилишида юртдошларимизнинг Осиё чемпионатидаги иштироки кўриб чиқилган. Мағлубиятга қарамай, терма жамоага Миржалол Қосимовнинг бундан кейин ҳам мураббийликни давом эттиришига келишиб олинган. Чунки жаҳон чемпионатининг саралаш ўйинлари бошланиши олдидан мураббийнинг алмаштирилиши жамоадаги муҳитга ва ўйинларга салбий таъсир кўрсатиши мумкин. Бироқ унинг айтишича, терма жамоа ўйинчилари таркибига ўзгартиришлар киритилади. Олий лигада тўп сураётган жамоалардан ёш ва иқтидорли йигитлар сараланиб, терма жамоага сафарбар этилади.
