“Юлдузлар ҳужуми” лойиҳасига бу гал Ўзбекистонда хизмат кўрсатган артист, Сурхоннинг шаддод ва “Яшин” аёли Ҳосила Раҳимовани таклиф этдик. Очиғи, Ҳосила Раҳимова ҳар ҳолда кўнгилдагидек ижоди, ҳуш овози, ўзига ҳос услуб ибилан кўпчиликнинг кўнглидан жой олганлиги боис, ҳамкасблари аввалига узоқ ўйлаб, сўнг танқид қилишга киришди.
Умида Мирҳамидова(хонанда):
-Ҳосила, сен ўзимнинг ўртоғимсан. Сен мухлислар ва жигарларингга бўлган меҳр муҳаббатинг, эътиборингни қандай тақсимлаган бўлардинг?
-Мухлиснинг бизга бўлган меҳрини бирдек сақлаб қолиш учун биз албатта ижод қилиб, тинимсиз қўшиқлар яратишимиз керак. Илоҳим, мухлислар мендан юз ўгирмасин. Лекин агар шундай бўладиган бўлса вазиятга қараб, янада кўпроқ ижод қилган бўлардим.
Ёқуб Аҳмедов(актёр):
-Пластик операция қилдирганингизни эшитиб ҳайрон қолганман. Кун келиб бундан афсусланишингизни биласизми?
-Кечирасиз. Ёқубжон, яхшироқ эътибор берсангиз мен ҳали юзимни жарроҳлик йўли билан торттирмаганман. Юзим ҳали ҳам ўша дўмбоққина, лўппичалигича қолган(кулади). Гўзаллик қурбонлик талаб қилади. Агар инсонда пластик жарроҳликка эҳтиёж сезилса, бунинг нимаси ёмон? Аёллар ҳам сиз каби эркакларга гўзал бўлиб кўринишни истайди-да!
Шоира Отабекова(хонанда):
-Ҳосила опа яқинда “My 5” телеканали орқали Ўзбекистонда хизмат кўрсатган артист Мавлуда Асалхўжаева билан биргаликда куйлаган дуэтингиз сизга умуман ярашмапти.
-Йўғ-е, ярашмаптими? (ҳайратланди). Агар телеканал ижодкорлари фольклор йўналишидаги бирорта қўшиғимни бирор ёш санъаткор билан ижро этишимни таклиф қилишганида ҳам жон деб рози бўлган бўлардим.
Шодия Ттўхтаева(актриса):
-Нега ўзингизга айнан шунақа, эркакча, тўпори Сурхон аёли имижини танладингиз? Сизни жуда ҳам меҳрибон, нозик қалб эгаси деб биламан! Балки шу нозик қалб дилини кўпчилик оғритганидан, тушунмаганидан мана шундай имдж танлагандирсиз?
-Фикрингиз учун раҳмат. Лекин тўпори аёл дея эътироф этганингиз нотўғри. Ҳеч қачон бизнинг аёлларимиз тўпори бўлмаган ва мен танлаган образ ҳам тўпори образ эмас. Тўпори ҳеч қачон ўзлигини намоён эта олмайди. Мен шаддод, қувноқ, кези келса юртни бошқара оладиган ўша Барчиной, Тўмарис каби момоларимизнинг тимсолини гавдалантираман. Ўтмишимизда мана шундай момоларимиз борлигини янги авлодага янгича талқинда ўз қўшиқларим билан очиб беришга ҳаракат қиламан. Тўйларда гап отиши мумкин бўлган эркаклар эса мени ўзларига дўст деб қабул қилишгани учун ҳам обрўйимни тўкмасликка ҳаракат қилишади. Чунки, Худога шукр, менинг барча мухлисларим яхши тарбия кўрган, санъатни ва санъаткорни қадрлайдиган инсонлар.
Фирдавс Пазлиддинов(хонанда):
-Қашқадарёга борганингизда сизга бир мухлис кесак отган эди. Сиз эса тап тортмай мухлисингиз тўйини тўхтатиб, микрофонда жаҳл билан гапиргансиз. Бу санъаткор маданиятга кирадими? Яна бир ҳазил саволим, ўшанда кесак отишган бўлишса, энди нима отишяпти?
-Ўшанда кесак менга отилмаган. Орқа томонда ўтирган аёллардан бири мени, раққосани кўриш учун кесакни олдинда тик туриб, орқадаги томошабинларни тўсиб қўйган йигитларга отган. Кесак болани ҳатлаб ўтиб менга келиб теккан. Мен буни айнан санъаткор маданиятини бузган ҳолатда эмас, шунчаки ўзимни ҳимоя қилиш учун одамларни инсофга чақиришга ҳаракат қилганман. Ҳазил саволингизга келсак, ўшанда кесак отишган бўлишса, энди гул отишяпти (кулади).
Юлдуз Абдуллаева (хонанда):
-Укангиз Абдуманнон Раҳимовнинг ижодига умуман эътибор бермаяпсиз...
-Укам аллақачон танилиб бўлди. Энди у ўз аравасини ўзи тортиши керак. Қачонгача у опасини укаси бўлиб қолиши керак? У энди фалончининг укаси эмас, фалончи унинг опаси дейишадиган даражада ижод қилиши керак.
Моҳичеҳра ЭШМИРЗАЕВА ёзиб олди
