Давлатимиз раҳбарининг 2013 йил 18 июнда қабул қилинган тегишли Қарорига биноан “Ангрен-Поп” электрлаштирилган темир йўл қурилиши бошланган эди. Экспертларнинг фикрича, “Ангрен – Поп ” темир йўли Ўзбекистонда ягона темир йўл тизимини шакллантириш, “Хитой — Марказий Осиё — Европа” халқаро темир йўл транзит йўлагини яратиш ҳамда Фарғона водийсини янада ривожлантиришга хизмат қилади, деб ёзмоқда uzreport.uz.
Лойиҳани амалга оширишнинг муҳим жиҳатларидан яна бири Фарғона водийси вилоятларига қулай шароит яратилиб, келгусида мажмуавий иқтисодий ва ижтимоий ривожлантиришни кўзда тутади. Узунлиги 123,1 километр бўлган янги асосий қатнов темир йўл Қамчик довони орқали денгиз сатҳидан 2,2 минг метр баландликдан ўтади. Пўлатдан қилинган трассанинг ноёб қисми 19 километрли тунел бўлади.
Унинг қурилишида "China Railway Tunnel Group" Хитой компаниясининг мингдан зиёд ходими иштирок этяпти. Уларга мамлакатимизнинг 500 нафар темирйўлчиси ёрдам бермоқда. Улар биргаликда туннелнинг 7,3 км.га бетон ётқизиб бўлишди. Тунелдан ташқари бу ерда 285 та сунъий объект, 22 та кўприк, 6 та йўл ўтказмалари ҳам барпо этилади. Шунингдек, 6 та темирйўл станциялари ва иккита вокзал қурилиши ҳам кўзда тутилган. Бунёдкорлик ишларига хитойлик мутахассислар билан бирга 3 мингдан зиёд юртимиз темирйўлчилари, шунингдек 300 дан ортиқ электрмонтажчиларимиз ҳам жалб қилинган. Улар 50 дан зиёд техник воситалардан фойдаланишмоқда. Бугунги кунгача 2 мингдан ортиқ темирбетон колонналари ва 600 дан кўп металл консуллар ўрнатилди. Янги йил арафасида “Ангрен” ва “Кул” станциялари оралиғида электрўтказгични монтаж қилиш ишлари якунланди.
Январ ойи бошида тунелнинг Ангрен томонидан қурилаётган 40 км.лик бўлагида темирйўлчилар тўсин ва рельсларни ётқизиб бўлдилар. Янги темирйўлнинг 17 км масофаси эса электрлаштирилди. Қурилиш ишлари жорий йилнинг охирига қадар давом этади. Кейинги йилда эса барча инфратизим қурилиши ниҳоясига етади. Хорижий ва маҳаллий экспертларнинг фикрича, янги пўлат магистрал мамлакатимизнинг транзит имкониятларини сезиларли даражада ошириб, Марказий Осиё давлатларини бир томондан Хитой билан, иккинчи томондан Европа мамлакатлари билан боғлайди.
