Ҳозирда “Уйда ёлғиз” комедиясисиз Янги йил байрамини тасаввур этиб бўлмайди. Бу афсонавий фильм, ҳаттоки, дунёдаги энг кассабоп картина сифатида “Гиннесснинг рекордлар китоби”га киритилган. Қуйида ҳукмингизга “Уйда ёлғиз” фильмининг машҳур бўлишига сабаб бўлган баъзи сирларини ҳавола этмоқчимиз (xabardor.uz ):
1. Ўғрилардан бирининг ролини ижро этган актёр Дэниэл Стерн (Марвин)нинг юзидаги ўргимчак ҳақиқий бўлган. Ўргимчакни қўрқитиб юбормаслик учун Стерн овоз чиқармаган ҳолда чинқираётгандек қилиб юзини буриштиришига тўғри келган, чинқириқ овози эса кейин қўшилган.
2. Фильм бош қаҳрамони Кевиннинг акаси Баззнинг яхши кўрган қизи аслида қиз бола эмас, фильм арт-директорининг ўғли бўлган. Уни қиз болага ўхшаш қилиб гримлаб қўйишган. Режиссёр шунчаки ҳақиқий қиз болани хафа қилишни истамаган.
3. Актёр Жо Пеши (Гарри) оилавий комедияда суратга тушаётганини унутиб қўйиб, кўпинча сўкиш сўзлардан бирини ишлатиб юбораверган. Фильм режиссёри актёрга бу сўкиш сўз ўрнига унга ўхшаш «fridge» (музлаткич) сўзини ишлатишни тавсия қилган.
4. Жо Пеши фильмга кўпроқ табиийлик бериш мақсадида унда бош ролни ижро этган Маколай Калкин ундан ҳақиқатда қўрқиши учун у билан суратга олиш майдончасида камроқ кўришишга ҳаракат қилган.
Ҳаттоки, бир марта Пеши бехосдан ёш актёрни яралаб қўйган. Бу бандитлар Кевинни илгичга осаётган саҳнани олиш пайтида содир бўлган. Бу саҳнада Пеши Кевинни илгичга осиб қўйиб, “Мен унинг бармоқларини бирма-бир узиб олишни хоҳлаяпман” деганча унинг бармоқларини тишлаётган пайтда ҳақиқатан ҳам Маколайнинг бармоқларини қон чиққудек даражада қаттиқ тишлаб олган.
5. Кевин телевизорда кўрадиган “Нопок қалбли фаришталар” фильм аслида бўлмаган. Бу гангстерлар ҳақидаги жангари фильмнинг кичик бир лавҳаси фильмдаги бир неча эпизодларда ишлатиш учун атайлаб суратга олинган.
6. Фильм деярли тўлиқлигича Чикаго шаҳрида суратга олинган, Париж шаҳри аэропорти лавҳалари эса аслида Чикагодаги О’Хара номидаги Халқаро аэропортда суратга олинган. Самолётдаги бизнес-класс тоифасидаги қимматбаҳо ўриндиқлар акс этган лавҳаларнинг декорацияси маҳаллий мактаблардан бирининг баскетбол майдончасида ўрнатилган, шу мактаб бассейни эса Маккаллистерлар уйининг сув билан тўлиб кетган ертўласига ўхшатиб жиҳозлаб суратга олинган.
7. Дарвоқе, фильмда Кевиннинг оиласи турган уй аслида Иллинойс штатида жойлашган бойлар турадиган Уиннетка қишлоғининг Линкольн Авеню, 671 манзили бўйича жойлашган. Ушбу уч қаватли уй 2011 йилда 2,4 млн доллар нархда сотувга қўйилган ҳамда 2012 йилда 1,585 миллион долларга сотилган. Ҳозирда уй сайёҳлар ташриф буюрадиган диққатга сазовор жойга айлантирилган.
8. Даставвал бандитлар ролига актёрлар Роберт Де Ниро ва Жон Ловитц таклиф этилган, бироқ улар бу таклифни рад этишган.
9. Маколей Калкиннинг укаси Киран фильмда ухлайдиган ўрнини доим ҳўл қилиб қўядиган Кевиннинг кичик амакиваччаси ролини ижро этган.
10. “Talkboy” маркасидаги диктафон фильм учун атайлаб ўйлаб топилган, аслида ишламайдиган бир марталик реквизит бўлган. Бироқ фильмнинг мухлислари унга шунчалик эга бўлишни исташганки, бир неча йил ўтиб бу ўйинчоқ диктафон ҳақиқатда яратилиб, дўконлар пештахталарига чиқарилган.
11. Кевиннинг қўрқинчли қўшниси сценарийнинг дастлабки нусхасида бўлмаган. Унинг персонажи кейинроқ режиссёрнинг таклифи билан фильмга қандайдир сентименталлик лавҳаларини киритиш мақсадида яратилган.
12. Даставвал фильмда Кевинни кечки уйқуда бутун уй ютиб юборишга ҳаракат қилаётгандек туш тақиб қилавериши кўзда тутилган. Бироқ фильмни суратга олиш шундоқ ҳам қимматга тушаётгани сабабли фильм ижодкорлари фақатгина “ёвуз печь” билан кифояланишга мажбур бўлганлар. Бу печга тасвирга олиш гуруҳининг икки аъзоси овоз берган ҳамда у леска ва фонарлар ёрдамида ҳаракатга келтирилган.
13. Баъзилар фильмда Элвис Преслининг ўзи тасвирга тушган деб ишонадилар. “Рок-н-ролл қироли” аслида ўлмаган деб ҳисоблайдиганларнинг кўпчилиги Кевиннинг онаси аэропорт ходимига бақираётган пайтда унинг орқасида турган қуюқ соқолли эркак ролини айнан Преслининг ўзи ўйнаган, деб ишонишади.
14. Бандитлардан бири Марвин босиб оладиган “шиша” арча ўйинчоқлари аслида конфетлардан ясалган. Бироқ бу ролни ижро этган Стерн ялангоёқ юрган саҳналарда ҳар эҳтимолга қарши оёқларига резина накладкалар кийиб рол ижро этган.
15. Маколей Калкин фильмдаги тузоқлар чизилган харитани ҳақиқатда ўзи чизиб чиққан.
