Олти кундан сўнг “Соғлом бола” йили тугайди. Лекин у кўпчилик машҳурларнинг умр дафтари саҳифаларида зарҳал ҳарфлар билан жажжи фарзандининг қўлидан тутиш бахтига муяссар бўлган онларини муҳрлади. Ўша ҳаяжонга тўла онларни яна бир бор эслашга жазм қилдик...
1. Бугунги кунда деярли барча хонандаларни турнақатор қилиб, навбатга туришга мажбур қилаётган, ошиғи олчи бўлиб қолган клипмейкер Наримон СУЛТОНХЎЖАЕВ 2014 йилда ўғил фарзандли бўлди. Яхши ният билан Арслон деб исм қўйди.
2. «Ситора» гуруҳининг иккинчи таркибида бўлган ва ҳозирда ЗАМЗАМА тахаллуси билан ижод қилаётган хонанда 24 январ куни иккинчи бор оналик бахтига эришди. Хонанда иккинчи қизига Гўзал деб исм қўйган.
3. Ўзбек Миллий академик драма театри ва кино актрисаси — Ўзбекистонда хизмат кўрсатган артист Шодия ТЎХТАЕВА 6 мартда фарзандли бўлди. Актриса айни вақтда Марямхоннинг тарбияси билан банд.
4. Шодиянинг кўзи ёриган туғруқхонада маҳоратли раққоса — Ўзбекистон халқ артисти Саида МАНСУРХЎЖАЕВА ҳам фарзандли бўлди.
5. Бу йил Ўзбекистонда хизмат кўрсатган артист унвонига сазовор бўлган раққоса Муҳаббат ҚУРБОНОВА 9 апрел куни иккинчи бор она бўлди. Қизига яхши ният билан Ширин деб исм қўйди.
6. “Бахт келса қўшалоқ келади”, деган нақл Ўзбекистонда хизмат кўрсатган артист Райҳон ҒАНИЕВАнинг ҳаётида ўз исботини топди. 5 май куни хонанда бирваракайига эгизакларни бағрига босди. Райҳон ва Йигитали фарзандларига Имрон ва Ислом исмини танлашди.
7. Акасининг қайинсинглисига уйланган хонанда Зохиршоҳ ЖЎРАЕВ 2 июлда қизлик бўлди.
8. Ижодига қараганда, шахсий ҳаётида кўпроқ омадга эришган хонанда Шербек ШОДИЕВ 10 июль санасида қизлик бўлди. Хонанданинг онаси яхши ният билан чақалоққа Марям деб исм қўйди.
9. Ўтган йили бўйдоқлар сафидан чиққан “Афруз” гуруҳи хонандаси Жамшид УМАРОВ 4 ноябрда фарзандли бўлди. Қизига София исмини танлашди.
10. “Ёшлар” телерадиоканалининг “Давр” информацион бошловчиси Ареват ГРИГОРЯН 15 ноябрда иккинчи бор оналик бахтига эришди. Иккинчи ўғлига Аюб деб исм қўйди.
11. Ёзган шеърлари таниқли хонандалар томонидан қўшиқ қилиниши орқали танилган, 10 декабр куни “Туркистон” саройида ижодий кечасини ўтказган шоир Аҳад ҚАЮМ 5 октябрь куни ўғилли бўлди. Фарзандига Акбарали исмини маъқул топишибди.
12. Собиқ афсонавий «Сетора» гуруҳининг вакилларидан бири Феруза ЛАТИПОВА ноябр ойида иккинчи бор оналик бахтига эришди. Хонанда анчадан буён чет элда истиқомат қилади.
13. Ўз ишининг устаси — клипмейкер Ёдгор НОСИРОВ 11 декабр куни фарзандли бўлди.
14. Ўз вақтида талабгор актёрлар учлигининг энг олдида турган, бироқ сўнгги пайтларда камнамо Улуғбек ҚОДИРОВ ҳам 2014 йилда фарзандли бўлди.
Садоқат АЛЛАБЕРГАНОВА тайёрлади
