Февраль ойининг бошида ижтимоий тармоқларда Хитой халқ республикаси фуқаросига турмушга чиққан ҳамда яшаш учун ушбу давлатга кўчиб кетган қизнинг фарёди акс этган видео пайдо бўлди. Унда турмуш ўртоғи томонидан таҳқирланаётган ўзбек қизи унга ёрдам беришларини сўраб мурожаат қилган.
Мазкур ҳолатда хабар топган Ўзбекистон Республикаси Хотин-қизлар қўмитаси дарҳол ҳолатни ўргана бошлаган.
Маълум бўлишича, қиз асли Наманган вилояти Тўрақўрғон туманидан бўлиб, Қиз Ўзбекистондан қиз топиб бериш билан шуғулланган Наргиза исмли қиз воситачилигида Хитой фуқароси билан танишиб қолган. Кейинчалик уни ёқтириб, ўз ҳоҳиш-истаги билан турмушга чиқишга қарор қилган. Сентябрь ойида у хитойлик инсон билан Ўзбекистонда қонуний никоҳдан ўтган. Дастлаб яхши ҳаёт кечирганини айтган Саида, кейинчалик турмуш ўртоғининг муқаддам ҳам ўзбек қизига уйланганидан хабар топган. Хитойга кўчиб кетгач эса у ерда ҳам унинг аёли борлигини билиб қолган. Саиданинг айтишича, йигитнинг онаси уни ўзбек қизига уйланишини истагани учун у Ўзбекистондан уйланишга қарор қилган. Кейинчалик у ерга кўчиб кетганида у аслида йигитнинг Хитойда оиласи борлигини яъни, ноқонуний никоҳи борлигини билиб қолган. Ушбу ҳақиқаттан хабар топган Саида Ўзбекистонга қайтиш истагини ва бу турмушида яшаш нияти йўқлигини билдирган. Бироқ йигит онасининг истагига қарши чиқмаслик учун уни қўйиб юборишни истамаган ҳамда унга турли йўллар билан таъзйиқ ўтказа бошлаган.
Ҳодисадан хабар топган Хотин-қизлар қўмитаси Ташқи ишлар вазирлиги ва Ўзбекистоннинг Хитойдаги элчихонаси кўмагида қизни Ватанига қайтаришга эришди.
Ҳозирда қиз уйида, у билан Қўмита томонидан бириктирилган психологлар ишламоқда. Қиз коллежини тугатиб, дипломини ололмагани сабабли унга коллежни тугатганлиги тўғрисидаги дипломини олиш, касб-ҳунарга ўқитиш, доимий иш жой билан таъминлаш бўйича амалий кўмак берилади.
Қўмита қиз ва унинг оиласини ўз назоратига олган. Қизнинг онасининг юраги хаста бўлгани сабаб ҳеч қаерда ишламайди, Қўмита унинг онасини ҳам саломатлигини тиклаш мақсадида ордер олишга кўмаклашди, 5 ёшар укасини боғчага жойлаштириш чоралари кўрилмоқда.
