Ўзбекистон Президенти Шавкат Мирзиёев Хоразм вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари бўлиб ишлаб келаётган Хўжаниёзова Шакаржон Юсуповна вафоти муносабати билан ҳокимликка таъзиянома йўллади.
Ўзбекистон президентининг давлат маслаҳатчиси Қаҳрамон Қуронбоев Хоразм вилояти ҳокимининг ўринбосари Шакаржон Хўжаниёзованинг дафн маросимида Шавкат Мирзиёевнинг Хоразм вилояти ҳокимлиги ва Ш.Ю.Хўжаниёзованинг оила аъзоларига йўллаган таъзияномасини ўқиб эшиттирди, деб хабар қилди ҳокимлик матбуот хизмати.
"Хоразм вилояти жамоатчилиги оғир жудоликка учради. Бевақт ўлим ажойиб инсон, моҳир ташкилотчи, иқтидорли раҳбар, меҳрибон она Хўжаниёзова Шакаржон Юсуповнани 63 ёшида орамиздан олиб кетди", — дейилган хабарда.
Элимизнинг қадрли фарзанди, ажойиб инсон, юрт равнақи ва турмуш фаровонлиги учун толмас курашчи Шакаржон Хўжаниёзованинг порлоқ хотираси қалбларимизда мангу яшайди.
