Кўп инсонлар сафарга отланаётганида йўлда тамадди қилиш учун турли егуликларни ғамлаб олишади ёки йўлга чиқишдан олдин тановул қилишга одатланишган. Бу каби одатлар ошқозонга қимматга тушмаслиги учун баъзи тавсиялар билан ўртоқлашамиз.
Енгил автомобилда бўлсангиз...
Кичик музлатгичли қутичангиз бўлса ҳам саёҳат қилиш пайтида озиқ-овқат маҳсулотларини сақламанг. Ахир бу техника қурилмаси, панд бериши ҳеч гап эмас. Машинада 2-3 соат давомида ўтирган ҳолатда кетасиз. Табиийки, тана ҳаракати суст бўлади. Бундай пайтда қовурилган, дудланган ёки калорияси юқори маҳсулотлар есангиз яхши ҳазм бўлмайди.
Тавсия этилади: Мевалар, масалан, олма, банан, узум, туршак, майиз, киви, ананас, олхўри кабилар. Ёнғоқ, майиз ва туршакни аралаштириб олсангиз ҳам бўлади. Ҳам тўйимли, ҳам фойдали. Кремсиз, қанд миқдори меъёрида бўлган печеньелар ҳам мумкин. Енгил тамадди учун ёғсиз пишлоқ ва салат баргидан бутерброд тайёрлаб олсангиз бўлади.
Газланган ичимликлар, тузли печенье, йогурт, дудланган қурут кабилар йўлда эрмак қилиниши учун харид қилинса-да, ошқозонингиз бу танловингизни маъқулламайди. Чунки уларни жой-жойига қўйишга қийналади-да.
Поездда бўлсангиз...
Йўлга чиқишдан олдин овқатланиб олганингиз маъқул. Поезднинг ҳаракатланиш мароми ҳар кимга турлича таъсир қилади. Таомланганда тўйиб еманг. Ошқозон ҳазм қилишга улгурмаса, қорин дам бўлиши, ич кетиши ёки кўнгил айниши мумкин.
Агар таомланишга улгурмасангиз, поездга чиқишингиз билан овқатланишга тушманг. Бир оз вақт ўтсин, унгача қаҳва ёки чой ичиб туришингиз мумкин. Йўл-йўлакай конфет ёки печенье тановул қилсангиз бўлади. Аммо ошқозонингизни кўпам сийлайверманг. Газланган ичимликларга ҳам чалғиманг. Йўл-йўлакай китоб мутолааси, мусиқа тинглаш ёки шунчаки ором олиб кетишингиз мумкин.
Самолётда бўлсангиз...
Сафарга чиқишдан олдин енгил тамадди айни муддао. Тўйиб овақатланманг. Ахир парвоз жараёнини организмингиз қандай қабул қилишини билмайсизку. Қолаверса, кун соатларининг ўзгариши ҳам турлича кечиши мумкин. Шу боис яхшиси, таваккал қилманг. Бунинг устига самолётда овқатланиш тартиби мавжуд.
Биринчи марта парвоз қилаётган бўлсангиз, бу ҳақда салон кузатувчисига хабар бериб, тинчлантирувчи чой қабул қилишингиз мумкин. Аммо ҳаяжонни жиловлаш учун конфет ёки печеньеларга чалғиманг. Тишга ҳам, ошқозонга ҳам зарар.
Одатда самолёт бортига турли ичимликларни олиб чиқишга рухсат берилмайди. Сафарга кетаётганлар ўзлари билан нон, туршак, майиз каби егуликларни олишлари мумкин. Агар булар орасида сифати бузиладиган, узоқ йўлга чидамсизлари бўлса, яхшиси, ташлаб кетинг.
