Асфандиёров номли Қозоғистон тиббиёт университетида ўқийдиган чет эллик — иорданиялик ва ҳиндистонлик талабалар норозилик намойишини ўтказди, деб хабар берди Tengrinews.kz нашри.
Улар университет ўқитувчиларини ўзларига нисбатан адолатсиз муносабатда бўлаётганликда айблади. Норозилик намойиши ўтказган талабалар давлат гранти асосида таълим олишади. Талабаларнинг айтишича, ўқитувчилар уларни имтиҳондан “атайлаб йиқитган”. Хусусан, “Анатомия”, “Гистология”, “Биохимия” ва “Молекуляр биология” фанларидан энг паст балли баҳони қўйишган. Агар улар юқорида номлари келтирилган фанлардан кам балл тўплайдиган бўлса, таълим учун пул тўлашларига тўғри келади. Чет эллик талабалар ўқитувчиларни ўзларига нисбатан ҳурматсизлик қилаётганликда ҳам айблашди. Норозилик намойишидан юздан ортиқ талаба иштирок этди. Улар ўзларини ташвишга солган саволга жавоб олмагунча, полда ўтиришди. Халқаро тиббиёт факультети декани Гавҳар Қурманова талабаларнинг шикояти ўрганилаётгани ҳақида маълумот берди.
Қозоғистон тиббиёт университетида мингдан ортиқ чет эллик талаба таълим олади.
