Қирғизистоннинг Норин шаҳрида яшовчи бир гуруҳ маҳаллий ёшлар Марказий Осиё Университети (Қирғизистон, Қозоғистон, Тожикистон ва шаҳзода Карим Оға-хон томонидан ҳамкорликда ташкил этилган халқаро олий ўқув юрти) талабаларини тиз чўктириб, кечирим сўрашга мажбур қилди, деб ёзди Tengrinews.kz нашри.
Уларнинг бундай йўл тутишига 27 май куни ўтказилган баскетбол мусобақасида маҳаллий ёшлар ва чет эллик талабалар ўртасида келиб чиққан жанжал сабаб бўлди.
8 июнь куни Норин шаҳрида яшовчи маҳаллий ёшлар университет биноси олдида йиғилиб, ҳукуматдан чет эллик талабаларни депортация қилишни талаб қилди. Орадан бироз ўтгач, университет талабалари ва баъзи бир ўқитувчилар тиз чўкиб, бўлиб ўтган воқеа юзасидан улардан кечирим сўради. Шундан кейингина маҳаллий ёшлар олий ўқув юрти биносини тарк этди.
Норинлик ёшларга нисбатан жамоат тартибини бузганлик юзасидан ҳуқуқ-тартибот идораси “Безорилик” моддаси бўйича жиноий иш қўзғади. Қирғизистон бош вазири Сооробой Жээнбеков мазкур жиноят ишини ўз назоратига олди.
Turmush нашрининг маълумот беришича, эртасига норинлик ёшлар университетга келиб, тиз чўккан профессор-ўқитувчилардан бўлиб ўтган воқеа юзасидан узр сўраган.
