Москвада май ойининг сўнгга кунлари бўлиб ўтган “Замонавий аэропортлар ва уларни ривожлантиришнинг энг янги анъаналари” мавзусидаги 51-Москва халқаро конференциясида йиллик “МДҲ мамлакатларидаги йилнинг энг яхши аэропорти” танлови натижалари сарҳисоб қилинди.
Бухоро ҳаво маскани “Аэропорт ривожига қўшган улкан ҳиссаси учун” номинациясида биринчи ўринни эгаллади ва кубок ҳамда диплом билан тақдирланди.
Фуқаро авиацияси “Аэропорт” ассоциацияси томонидан Бухоро аэропортига топширилган биринчи мукофот эмас. Бугунги кунгача “Бухоро” аэропорти тўрт марта “МДҲ мамлакатларидаги энг яхши аэропорт”, уч марта “Шиддат билан ривожланаётган аэропорт” ва икки марта “Истиқболли аэропорт” совринларини қўлга киритган.
1999 йилда Бухоро аэропортига халқаро мавқе берилган. 2011 йилда соатига 400 йўловчига хизмат кўрсатадиган янги аэровокзал мажмуаси қурилди. 2016 йилда “Русский регистр” халқаро ассоциациясининг ISO 9001:2015 сертификати олинди.
Бугунги кунда Бухоро аэропорти барча турдаги «Боэинг» ҳаво кемаларини, шунингдек, А-310/320/321, Ан-124 «Руслан» ва бошқа самолётларни қабул қилиш имконига эга.
