АҚШнинг Мейн штатидаги Люистон шаҳрида қуролли шахс одамларни ўққа тутган. Дастлабки маълумотларга кўра, камида 22 киши ҳалок бўлган, 50 дан ортиқ киши эса жароҳатланган.
АҚШ полициясига кўра, қуролланган одам ҳалигача топилмаган. Полиция шунингдек, жиноятчи қуролли ва ўта хавфли экани ҳақида аҳолини огоҳлантирган.
Айтилишича, гумонланувчи 40 ёшли Роберт Кард исмли шахс бўлган.
Жиноятчи топилгунича шаҳар аҳолисига хавфсиз жойларда бошпана топиш тавсия этилган ва бутун шаҳарда карантин жорий қилинган.
"Люистонда кучли отишма рўй берди. Биз аҳолидан ўз уйларида қолишларини сўраймиз. Илтимос, уйларингизда қолинг ва эшикларингизни қулфланг" дея ёзган Мейн штати полицияси ўзининг X ижтимоий тармоғидаги саҳифасида.
Шунингдек, полиция жиноятчининг шахсини аниқлаш учун ёрдам сўраган. Мамлакат президенти Жо Байден эса воқеадан бохабар қилинган.
