Tahririyatimizga Samarqand viloyati Paxtachi tumanidan kelgan murojaatda 42 yoshli ayol 14 yoshli qiziga dugonasi tomonidan etkazilgan tan jarohati haqida yozib, nohaqlik yuzasidan qonun doirasida jazolanishi uchun amaliy ko`mak so`ragan. Murojaatdagi holatlar Samarqand viloyat prokuraturasi tomonidan o`rganildi.
O.Azimov, Samarqand viloyati prokurorining birinchi o`rinbosari:
- Viloyat prokuraturasi tomonidan fuqaro M.Tuxtaevaning qo`shnisi S.Jo`raqulovaning noqonuniy harakatlaridan norozi bo`lib yozgan murojaati ko`rib chiqildi.
Aniqlanishicha, 2015 yil 18 mart kuni soat 15.00 larda Paxtachi tuman "Yangiobod" mahallasida yashovchi 2001 yil 20 oktyabr kuni tug`ilgan S.Jo`raqulova sinfdoshi 2001 yil 02 iyun kuni tug`ilgan Ya.Tuxtaeva bilan o`zaro janjallashib, oshxona pichog`i yordamida unga jarohat etkazgan.
Ushbu holat yuzasidan tuman Ichki ishlar bo`limi Tergov bo`limi (IIB TB) tomonidan tergovga qadar tekshirish olib borilib natijasiga ko`ra Jinoyat Prosessula Kodeksning 84-moddasi 1-qismi 7-bandi, 83-moddasi 2-bandiga asosan jinoyat ishi qo`zg`atish rad etilgan.
Mazkur holat yuzasidan Paxtachi tuman IIB TB tomonidan qabul qilingan qarorlar viloyat hamda O`zbekiston Respublikasi Bosh prokuraturasi tomonidan bekor qilinib qo`shimcha tekshirish o`tkazish uchun yuborilgan.
Tekshirish yakuniga ko`ra tuman IIB TB tomonidan voyaga etmagan S.Juraqulovaning harakatlarida qasddan odam o`ldirishga suiqasd qilish, ya`ni Jinoyat kodeksining 25-97-moddasi 1-qismida ko`rsatilgan jinoyat tarkibi yo`qligi, voyaga etmagan S.Jo`raqulovaning harakatlarida qasddan badanga og`ip shikast etkazish, ya`ni JKning 104-moddasi 1-qismida ko`rsatilgan jinoyat alomatlari mavjudligi, biroq mazkur jinoyatni sodir etgan vaqti uning jinoiy javobgarlikni nazarda tutuvchi 14 yoshga to`lmaganligi, shuningdek voyaga etmagan Ya.Tuxtaevaning harakatlarida Ma`muriy Javobgarlik to`g`risida kodeksning 52-moddasi 2-qismida ko`rsatilgan engil tan jarohati etkazish ma`muriy huquqbuzarlik alomatlari mavjudligi, lekin u huquqbuzarlik sodir etgan vaqti 14 yoshga to`lmaganligi inobatga olinib 08.08.2015 yilda JPKning 83-moddasi 2-bandi, 84-moddasi 1-qismi 7-bandi va MJtKning 13-moddasiga asosan jinoyat ishi qo`zg`atishni rad etish to`g`risida qapop qabul qilingan.
Shuningdek, farzandlarini ta`lim-tarbiya berish borasidagi majburiyatlarini lozim darajada bajarmagan S.Jo`raqulovaning onasi Z.Nazarova va Ya.Tuxtaevaning onasi M.Tuxtaevaga nisbatan MJtKning 47-moddasi bilan ma`muriy chora ko`rish uchun to`plangan hujjatlar tuman hokimligi huzuridagi voyaga etmaganlar ishlari bo`yicha komissiyasiga yuborilib, Paxtachi tuman hokimligi huzuridagi voyaga etmaganlar ishlari bo`yicha komissiyasining qaroriga asosan Z.Nazarova va M.Tuxtaevaga nisbatan MJtKning 47-moddasi 1-qismi bilan ma`muriy jarima qo`llanilgan.
Mazkur qaror viloyat prokuraturasi tomonidan o`rganilib asosli deb topilgan.
