Maktabda suv toshganligi haqidagi videolavhaga Qo`rg`ontepa tuman hokimligi raddiya bildirdi

Joriy yilning 25 fevral kuni ijtimoiy tarmoqlar orqali “Bu suzish havzasi emas, basketbol maydoni!” nomli mavzusida video va maqola chop etilgan edi. Havola etilgan videolavha Samarqand viloyati Qo`rg`ontepa tumanidagi 33-umumiy o`rta ta`lim maktabida suv toshganligi xaqida bo`lib, tuman hokimligining Matbuot xizmati bu xabarga quyidagicha raddiya bildirdi:

"Videolavxa taqdim etilganidan so`ng Matbuot xizmati va tuman hokimining Qurilish ishlari bo`yicha o`rinbosari ishtirokidagi guruh darhol ushbu maktabga tashrif buyurib, mavjud holatni o`rgandilar.
Ma`lum bo`lishicha ushbu videolavha o`tgan 2019-yilning kuz oylaridagi kuchli jala sodir bo`lganidan so`ng tasvirga olingan. Ushbu holat to`laligicha tabiiy xodisa oqibati bo`lib, biror suv quvuri ham teshilmagan, biror ariq yoki boshqa joydan suv oqib kelmagan.
Videolavhadagi suv esa zo`a vaqtda 1-2 soat ichida oqava yo`l (paynob) orqali bartaraf bo`lgan.

Bundan tashqari, ushbu maktabning sport majmuasini ta`mirlash, ushbu hududdagi yana bir maktabdagi sharoitlarni yaxshilash yuzasidan, videolavha taqdim etilishidan 3 kun oldin tuman hokimining Qurilish ishlari bo`yicha o`rinbosari tomonidan yig`ilish o`tkazilgan. Ushbu maktablarda belgilangan tartib bo`yicha ta`mirlash ishlarini olib borish uchun, smetalar va boshqa kerakli ishlar rejalashtirilgan va hozirgi paytda bu ishlar boshlanish arafasida".

Raddiyada aytilishicha, video muallifining keltirgan noo`rin izohlari to`laligicha asossiz bo`lib chiqdi.