Hindiston tibbiyoti taraqqiy etgan davlatlardan sanaladi. Bugun mamlakatda tibbiyot turizmi yaxshi rivojlangan. Har yili dunyoning turli davlatlaridan ko`plab insonlar dardiga davo topish ilinjida Hindistonga keladi. Malakali mutaxassislar ularni davolashning uddasidan chiqmoqda.
Hindistondagi “Medanta” klinikasi xorijda ham ma`lum va mashhur. Bu erda travmatologiya, kardiologiya, onkologiya singari kasalliklar davolanadi. Klinikada yurak jarrohligi, turli a`zolar transplantasiyasi o`tkaziladi. Bosh miya jarrohligida esa ilg`or innovasion usullar qo`llaniladi. AQSh va Singapurda ham filialiga ega klinikaga har yili minglab bemor murojaat qiladi. Ular orasida yurtdoshlarimiz ham bor.
Mazkur klinikaning ilg`or yutuqlari va yurtdoshlarimizning talab va ehtiyojini inobatga olgan holda uning O`zbekistonda filialini ochish rejalashtirilgan. Sog`liqni saqlash vazirligi matbuot xizmati ma`lumotiga ko`ra, vazirlik va klinika rahbariyati o`rtasida bo`lgan uchrashuvda bu haqda kelishib olindi, deb yozmoqda O`zA.
Uchrashuvda “Medanta” klinikasi rahbari Naresh Trexan O`zbekistondagi filial Hindistondagidan qolishmagan holda eng zamonaviy tibbiy texnika vositalari bilan jihozlanishini, bu erda malakali shifokorlar ishlashini alohida ta`kidladi.
Yangi loyihaga 15 million AQSh dollari miqdorida investesiya jalb qilinishi ko`zda tutilgan.
Naresh Trexan fikricha, o`zbekistonlik shifokorlar, xususan, jarrohlar, kardiologlarning bilimi va malakasi yuqori, lekin ularning zamonaviy texnologiyalardan samarali foydalanish ko`nikmasini yanada oshirish zarur. Shu bois, filial ishga tushgan dastlabki oylarda mahalliy mutaxassislar hindistonlik hamkasblaridan bu borada o`zaro tajriba almashadi.
O`zbekistonda mazkur klinikaning ochilishi hamyurtlarimizning uzoq yo`l bosib Hindistonga borish mushkulidan ozod qiladi, o`z navbatida, bu erda qo`shni davlat fuqarolari ham davolanish imkoniga ega bo`ladi.
O`zbekiston – Hindiston hamkorligining yana bir samarasi “Pratiksha hospital Group” klinikasining yurtimizda faoliyat boshlashga qiziqish bildirayotganida namoyon bo`ladi.
Mazkur loyihaga investorlarning 10 million dollardan ortiq mablag`i sarflanishi kutilmoqda.
Mamlakatlarimiz o`rtasida tibbiyot sohasidagi hamkorlikning yangi bosqichda yo`lga qo`yilishi va bu boradagi ishlar samaradorligining oshishi, avvalo, xalqimiz sog`lig`ini saqlashga, xalqlarimiz o`rtasida do`stona munosabatlar yanada mustahkamlanishiga xizmat qiladi.
