Xabaringiz bor, 15 fevral, shanba kuni, ijtimoiy tarmoqlarda IIB xodimlari va aholi o`rtasida to`qnashuv sodir bo`lgani haqidagi video tarqaldi.
Shundan so`ng, holat yuzasidan IIVning va Bosh prokuraturaning rasmiy ma`lumotlari berildi. Vaziyat keskin tus olgani sabab Surxondaryo viloyati hokimi ushbu hududga tashrif buyurib, jabrdiyda xalq bilan yuzlashdi. Ushbu voqealarning eng shov-shuvlisi esa Milliy tiklanish partiyasi rahbari Alisher Qodirovning voqeaga nisbatan munosabati bo`ldi. Aholining harakatlarini qoralagan deputat ularga munosib jazo berilishini talab qilgani keng jamoatchilik tomonidan tanqidlarga sabab bo`ldi. Kuni kecha Xalq deputatlari Arnasoy tuman kengashi deputati, "Adolat" partiyasi vakili Farruh ABDUHAMIDOV ham ushbu hodisa va "snos" masalasiga munosbat bildirgan bo`lsa, ayni paytda “Adolat” SDP Siyosiy Kengashi raisi Narimon Umarov ham vaziyatga ob`ektiv baho berdi.
"O`zbekiston “Adolat” sosial-demokratik partiyasi ushbu jarayonda adolat qaror topishi uchun har ikkala tomon ham tinglanishi, vaziyat chuqur o`rganilishi lozim deb hisoblaydi.
Sug`oriladigan erlarning har bir qarichidan maqsadli foydalanish darkor, chunki aholimizni xavfsiz oziq-ovqat bilan ta`minlash o`ta muhim masaladir.
Aksariyat hollarda er egalari bo`lgan fermerlar nopok yo`llarga kirib, ular tomonidan dehqonchilikka mo`ljallangan er maydonlari uy, binolar qurishga ajratilayotganligini noqonuniy harakat deb baholaymiz.
Bunday hollarda eng avvalo, ushbu erlarni ajratishga javob berganlar qonuniy javob berishi kerak. Shundagina adolat ta`minlanadi. Shuning uchun fuqarolar uy qurishi uchun sharoit yaratib bergan fermer yoki boshqa mutasaddilarning javobgarligi kun tartibiga chiqarilishi zarur. Biz hozir sabablar bilan emas, oqibat bilan kurashmoqdamiz. Bu zaylda ketadigan bo`lsa, bunday holatlar ertaga boshqa hududda ham kelib chiqishi aniq.
Shuning uchun bu jarayonda asosiy e`tiborni vaziyatni keltirib chiqargan sabablarni bartaraf etishga qaratilsa maqsadga muvofiq bo`lar edi.
Qaerda qonun ustuvor bo`lsa, o`sha erda adolat hukm suradi, rivojlanish bo`ladi", — o`z mulohazalarini bildirgan partiya rahbari.
Eslatib o`tamiz, O`zbekistonning ko`zga ko`ringan, faol blogerlar kanallarida Alisher Qodirovga atalgan munosabatlar ommaviy aks etmoqda.
